黃手套惡作劇?丨呂慧儀稱唔好諗太多嘢 劉丹:相信以後大家會小心啲

更新時間 (HKT): 2020.09.16 16:12

人生別太在意,人走茶涼,尤其在跟紅頂白的娛圈當中。今日一眾《愛.回家》藝人出席宣傳活動,被問到有關「黃手套」風波,一概說交由公司處理,更避談合作多年的導演Justin離職一事。

事緣無綫上周三(9日)播出處境劇《愛.回家之開心速遞》中,出現「五一」抗爭手勢畫面足足14秒,據知今次事件起因是由於該劇一位藝人貪玩將其中一隻黃色手套擺出「舉中指」手勢,其他藝員見狀亦有大笑,誰知出來效果卻變成「五一」手勢,無綫最終卻逼有份負責該場戲的導演Justin孭鑊,要求他遞信。

緋聞情侶張景淳及呂慧儀在受訪時,直言拍攝4年跟劇組感情越來越好,好似家人一樣,默契也越來越好,每天都見面,也感謝編劇想出這麼多故事,之不過問及「黃手套」風波,呂慧儀即耍太極:「呢啲公司處理緊,我諗我交返畀公司處理。」

問到當日有否留意,呂慧儀說:「冇留意到,我哋(企)好遠,因為嗰個位都唔喺我哋嘅視線範圍。」講到她在該場口本身戴着手套演出並沒嫌疑,而其他人卻成為嫌疑人,她不敢多言:「係啦!唔好諗得太多嘢,同埋交咗畀公司去處理,我諗公司會查到。」

劉丹坦言拍攝時不知此事:「第一我係後嚟睇嗰張相先知道,第二當時我哋演戲嗰陣,我們喺後面向前看,根本睇唔到,所以我哋都係糊裡糊塗,大家都唔知道,如果唔講出嚟,我哋睇嗰張相都唔會注意係咩嚟,但係呢件事,公司方面一定會查清楚,咁大間公司有唔少有能力嘅高人,佢哋會處理好呢件事,查得到,拍戲嗰陣,我哋都唔知道,事後演員都係糊裡糊塗,後嚟先知道有呢件事,但係已經發生,公司應該會好好處理,應該冇咩大問題,以後我相信大家都會小心啲。」

講到導演Justin被辭職,劉丹表示知道這件事:「到底係咩事,我哋就唔知道,再過一段時間,應該會有正確嘅消息就會通知我哋,現時我哋都係唔了解,好似呢種事,我哋都唔可以亂猜,謹慎一啲比較好。」

-----------------------------

《蘋果》英文版免費試睇:了解更多

英文版已登錄《蘋果》App,立即下載/ 更新iOS / Android

-----------------------------

支持蘋果深度報道,深入社區,踢爆權貴,即Like蘋果專題及調查組FB專頁

娛聞樂陪你走遍全球追星,即Like「娛果」FB 專頁!
BannerBanner