譚炳文設靈 | 炳嫂堅強面對顯冷靜 女兒望大家笑住送行

更新時間 (HKT): 2020.09.21 19:22

譚炳文於本月5日因肺癌離世,享年86歲,今日在紅磡世界殯儀館設靈,炳嫂表情平靜,女兒譚淑瑩接受傳媒訪問,透露爸爸皈依密宗多年,故喪禮採用密宗儀式進行。問到媽媽是否已平復?瑩瑩坦言媽媽比她堅強及冷靜,可能內心很悲傷,但沒表露出來,自己比較脆弱,可能廿多年來,每天都跟媽媽陪伴着爸爸,所以心情很複雜,佢(父)登台、食飯、入醫院都係我去,所以心情比較複雜。」

瑩瑩自言依依不捨,但今天必須更堅強:「因為師傅話如果你想爸爸去到西方極樂世界,誦咗咁多經,可以去到嗰個位置,但你傷心,佢唔捨得你,佢要落返嚟,咁就前功盡廢,所以我今日一定要好堅強,幫佢完成呢個Party,等佢開開心心見番所有親友,做好呢個喪禮。」她很遺憾有些親友趕不及回港送爸爸最後一程:「有啲冇香港身份證,有啲因為太急,就算返嚟都要隔離14日。但都有留言,同埋有send說話畀佢,因為佢嘅電話,我仲有keep住,我冇熄佢電話,仲開住,我當佢仲活喺我身邊。」

提到炳哥的遺願,瑩瑩表示已經一一為他達成:「佢應該有個心願,但冇講出口,曾經講過如果離開前都可以食到嘢、講到嘢,因為佢最緊張自己把聲,就算病嘅時候,嗰日冇聲都會好緊張,所以佢臨離開嗰日,講到嘢、食到嘢,同埋瞓住覺咁走,冇辛苦、掙扎、插喉,我諗呢啲就係佢自己許諾嘅最大心願。」炳哥生前希望舉行生日會,瑩瑩表示已無能為力,所以今日喪禮就當是爸爸的Party,希望大家笑住送他一程,讓他開心快樂走向西方極樂世界。

陪葬品方面,瑩瑩透露準備了近年爸爸常穿的羽絨褸,他很喜歡的綢仔、配音耳塞、登台時常用的眼鏡和一些衣服鞋襪。問到好友李香琴是否已知道炳哥的病逝消息?她說:「其實我估佢屋企人有講畀佢聽,但我真係唔知佢知唔知道,因為佢真係知道都唔定,都係嗰句啦!人年紀大咗,未必會知道。」她還表示有份負責揀選爸爸的遺照,是在無綫領獎時的照片:「佢好鍾意呢張相,亦好鍾意呢個獎牌,所以我就用咗呢張。」

-----------------------------

《蘋果》英文版免費試睇:了解更多

英文版已登錄《蘋果》App,立即下載/ 更新iOS / Android

-----------------------------

支持蘋果深度報道,深入社區,踢爆權貴,即Like蘋果專題及調查組FB專頁

娛聞樂陪你走遍全球追星,即Like「娛果」FB 專頁!
BannerBanner