無綫冇份丨黃秋生爭亞洲視帝望現身新加坡 嘲港府「旅遊氣泡」名改得衰

更新時間 (HKT): 2020.10.16 12:11

由ViuTV自家製作的劇集《二月廿九》(Leap Day)及《理想國》(The Republic),兩劇嶄新的題材,不單止叫好叫座,更入圍今屆新加坡亞洲學院創意獎。《二月廿九》先成為香港區的「最佳電視劇」,迎來首個國際性獎項外,會在12月4日在新加坡舉行的頒獎禮,跟其他國家及地區劇集爭取「亞洲大獎」。至於主演《理想國》的黃秋生,亦入圍最佳男主角爭「亞洲視帝」。不過入圍名單中,每年拍不少港劇的無綫,卻一套都冇入圍,不知是無綫沒有報名,還是大台只是北望神州呢?

由新加坡媒體發展管理局(IMDA)主辦的亞洲學院創意獎(Asian Academy Creative Awards )昨日(15日)公佈今屆入圍名單,黃秋生憑主演的《理想國》入圍最佳男主角,與台劇《三春記》的夏靖庭、大陸劇《鹤唳華亭》的羅晉等爭「亞洲視帝」,黃秋生接受《蘋果》訪問講入圍感受時話︰「咁梗係高興啦,人哋咁畀面。新加坡係好地方,啲叻沙咁好食,仲有海南雞飯。如果有機票又有時間嘅,都會去呀,當旅遊幾日。」秋生表示今次獲提名,是整個《理想國》班底的成功。至於最佳女主角方面就有台劇《舞出寂靜》江宜蓉等入圍爭「亞洲視后」。

此外,秋生有機會受惠香港政府及新加坡政府合力推出的「旅遊氣泡」計劃,免卻14日隔離檢疫,秋生即刻半開玩笑話︰「吓,乜嘢嚟,邊有人改呢啲名,一諗就諗起『泡沫經濟』,不如你叫『(旅遊)頭七』,人衰改啲名都衰過人,肯定唔係新加坡政府改。唔好理佢,總之新加坡係好地方,亦都多謝佢咁畀面。」至於香港商務及經濟發展局局長邱騰華,昨日舉行記者會宣佈跟新加坡就「航空旅遊氣泡」機制達成原則性協議,主要內容是旅客接受兩地互認的聚合酶連鎖反應(PCR)測試,旅客抵達入境後毋須接受強制檢疫或履行居家通知,藉此促進雙邊旅遊業。

至於劇集方面,《二月廿九》成為今屆香港區「最佳電視劇」(Best Drama Series),而其他地區還有韓國的《愛的迫降》,以及台灣的《誰是被害者》等,共11個國家及地區的劇集,將於12月舉行的頒獎禮上爭奪「亞洲大獎」殊榮。得悉《二月廿九》入圍兼獲香港區「最佳電視劇」,導演羅嘉駿在社交網留言︰「《二月廿九》贏得嘅第一個國際獎項 - Asian Academy Creative Awards香港區Best Drama!冇呢班黐線佬製作團隊,同埋超熱情觀眾就成就唔到229,再次多謝大家。」

有份主演《二月廿九》的吳海昕,對贏獎兼代表香港參加新加坡亞洲學院創意獎,她以短訊回覆《蘋果》時表示︰「得知呢個喜訊好開心,觀眾對《二月廿九》嘅支持同口碑,絕對係對台前幕後最大嘅支持同鼓勵。今次得獎,團隊喺WhatsApp group好興奮,自己有份參與係一份榮幸。至於會唔會去新加坡要睇導演頭,佢仲諗緊。」

而另一位演員劉俊謙回覆《蘋果》表示︰「首先我為整個團隊感到十分自豪!能夠在緊絀的資源下,創作出一套備受香港觀眾喜愛的電視劇,絕對歸功於這個瘋癲而又不計較付出的團隊。雖然在香港創作越來越困難,但是希望大家可以看到有一班年輕的創作人並沒有放棄,我們依然在創作我們所愛的。」

-----------------------------

《蘋果》英文版免費試睇:了解更多

英文版已登錄《蘋果》App,立即下載/ 更新iOS / Android

-----------------------------

支持蘋果深度報道,深入社區,踢爆權貴,即Like蘋果專題及調查組FB專頁

娛聞樂陪你走遍全球追星,即Like「娛果」FB 專頁!
BannerBanner