拒絕成龍追求丨56歲吳家麗憧憬真愛 極速抽身從未愛上拍檔

更新時間 (HKT): 2020.10.17 13:38

81年大台訓練班出道的金馬影后吳家麗,近日應監製好友伍健雄之邀,參演viutv劇《熟女強人》,聯同視后胡杏兒、沈卓盈、陸詩韻等齊齊倒戈撼娘家。當年藝訓班畢業後,吳家麗多被派演第三者壞女人角色,她接受《1圈圈 星光背後》專訪,透露當年因外型被定型,曾於《季節》一劇演破壞顏國樑林建明夫妻的狐狸精試過當街被罵,「當年《季節》好hit,試過同媽媽行超巿,某師奶對住我話:『佢咪果隻嘢囉!』聽完好唔開心,因為我阿媽喺隔離,我知道我被人鬧係因為演得好,冇所謂,但我擔心阿媽,怕佢心想點解要生個女出來俾人鬧!」

87年周潤發的經典電影《龍虎風雲》,是吳家麗初進影圈兼奠定「吳九組」風情萬種角色的事業轉捩點。節目中,吳家麗自揭最近才得知自己是「執二攤」,她說:「最近編劇沈西城先話我知呢個秘密,當年新藝城好想搵另一位當紅女演員演戲中嘅紅姐,哈!角色叫紅姐大家都估到係邊個啦。不過最後種種因素下,係林德祿拍板用我,甚至見到我嘅外型就有信心話唔使試戲,所以林嶺東係我恩師,佢大膽起用我個新人。」

多年來,吳家麗先後跟無數圈中男神演對手戲,但依然零緋聞,更盛傳拒絕過成龍追求。她坦言從沒戲假情真愛上拍檔,「話你知,當年我拍太多戲,首先,我好叻好快食番啲嘢,呢一套拍完就立即忘記,事關馬上就要投入另一齣戲;其二,觀眾只睇到我對手,譬如發仔、萬子、劉德華等好型好靚仔一面,而我cut機後就會見到佢哋私底下嘅樣,唔係話佢哋私下唔好,但我只會欣賞佢哋專業及演戲,唔會聯想佢哋係我嘅男朋友。」她自言性格保守,所以一直堅拒露點,「露點唔適合我,唔一定要除晒先叫性感,其實我係一個好傳統同保守嘅女人,曾經有部故事唔錯的劇情片,有啲鏡頭想搵我演,最後我係承擔唔到冇接。」

所以,吳家麗出道以來從沒有跟圈中人拍拖,只公開過已離世的督察前男友王永基有過一段十年情。而對於二人93年分手後,男方突然於98年集訓中猝死,吳家麗淡然說:「當時我唔喺在香港,係突然,但冇喊,只覺人生好戲劇化。可能我演戲好識掉嘢,當然佢喺我生命中有美好嘅回憶。」王永基之後,雖然身邊不乏追求者,但56歲的吳家麗至今仍是單身,但她依然憧憬有真愛出現,「我仍然相信在世界另一邊有一個跟我很夾、相處很舒服的人會出現。」

-----------------------------

《蘋果》英文版免費試睇:了解更多

英文版已登錄《蘋果》App,立即下載/ 更新iOS / Android

-----------------------------

支持蘋果深度報道,深入社區,踢爆權貴,即Like蘋果專題及調查組FB專頁

娛聞樂陪你走遍全球追星,即Like「娛果」FB 專頁!
BannerBanner