余香凝被傳奉子成婚 好姊妹蔡明思:我希望自己有先

更新時間 (HKT): 2020.10.20 19:12
(蘋果日報)

Super Girls成員陳穎欣(Yanny)與蘇麗珊合資於荃灣開設食店,今日是新店剪綵日子,一眾好姊妹趙慧珊(Aka)、蔡明思(Jessica)及吳嘉熙(Cheronna)到來支持。兩位老闆親手炮製話梅特飲給3人享用,人妻Jessica即話「我要2粒話梅少冰。」Yanny打趣笑說:「係咪有好消息公佈?」Jessica否認並品嚐凍飲。

一身密實打扮的Jessica受訪時再否認有喜,但談到余香凝去年接過她的花球後,下月便將會出嫁,她沾沾自喜指證明自己花球靈驗。對於有指余香凝是雙喜臨門,Jessica說:「呢個我唔知,我希望自己有先,日前Cheronna陪我去龍母廟求子。儀式後廟祝畀咗個柚子我,一踏出廟就有陽光射埋嚟,我感覺好似抱住個子咁。」她指老公都想要小朋友,問到可有勤力造人?她說:「佢好勤力摸柚子,仲將個柚子放喺風水位。」Cheronna信奉其他宗教,但為了好姊妹求子成功也陪伴同行。

Yanny去年於荔枝角開設首間食店,由於大受歡迎便決定疫情下開分店,有份入股的蘇麗珊自言是Yanny食店捧場客,她說:「其實我哋本身唔識,只係我喺網上follow佢嘅嘢,真正認識係幾個月嘅事,當知道佢想開分店,我咪提議入股。」今次兩人合共投資6位數,Yanny指蘇麗珊男友Kenny在新店給予不少寶貴意見,加入藝術元素,店內定期會展覽藝術家畫作及義賣,善款全數捐助慈善機構,問到Yanny若果見到蘇麗珊跟男友因店舖設計吵鬧會怎樣做?她信心十足說:「我冇諗咁多,因為認識嘅佢哋都好斯文、冇火爆。」蘇麗珊也自言任何事也答「好」,所以不會有甚麼爭拗。

另外Aka早前被狗咬爆嘴後險破相,今次是她傷後首次出席公開活動,被關心現時嘴唇康復程度,她即除口罩說:「好番晒,我冇搽遮瑕膏,好彩受傷嗰日有朋友醫生好快幫我縫咗9針。今次最大反差係我領養咗朋友啱啱出世狗仔,如果跨過到心理障礙,我會再去狗場做義工。」

-----------------------------

《蘋果》英文版免費試睇:了解更多

英文版已登錄《蘋果》App,立即下載/ 更新iOS / Android

-----------------------------

支持蘋果深度報道,深入社區,踢爆權貴,即Like蘋果專題及調查組FB專頁

娛聞樂陪你走遍全球追星,即Like「娛果」FB 專頁!
BannerBanner