苑瓊丹感謝老公一直付出 預告他日被出軌亦可無視以作報恩

更新時間 (HKT): 2020.10.25 17:09

苑瓊丹早前接受商台節目《1圈圈 星光背後》訪問,講及自己的事業與感情。現年57歲的苑瓊丹,自言是個臭脾氣的烈女,但遇上「軟皮蛇」的老公,她冇晒符!

苑瓊丹最為人知的,是與「殭屍道長」林正英之間的一段情,但林正英於1997年患癌病逝後,苑瓊丹到2001年認識現任丈夫、富商黃乃揚,2人在2004年於美國秘密註冊結婚,至2009年才被揭發,她指結婚16年間,亦曾鬧出分居危機,她形容自己「惡過鬼」,又試過鬧上律師樓簽分居紙,後來黃乃揚低調找律師說要取回。苑瓊丹最難忘老公的付出:「我阿媽離世前有病,佢(黃乃揚)會願意賣晒所有嘢、買間大屋同我家人一齊住。我北上工作時,佢又照顧我阿媽,陪佢飲茶、打針睇醫生。到我媽媽離世當日,佢嚟機場接我,比我喊得更厲害。嗰次之後我開始反省、消化自己。我咁臭脾氣,邊個可以忍受?邊度會有人待我好似佢咁好?之後有晚,我同老公講:『其實我好多謝你幫我同我啲家人!所以從今開始,以前發生過咩事,我唔會提;之後發生乜嘢,亦唔會計較!』即使日後有記者影到我老公拖住第2個女人,我都冇所謂,因為佢一路對我嘅付出,着實太多!而家佢係我嘅親人。」

至於事業方面,亞視出身的苑瓊丹,獲賞識晉身電影圈,並先後8次與周星馳合作,其中她在電影《唐伯父點秋香》中的「石榴姐」一角,成功助苑瓊丹殺入大陸市場,多次被安排演醜角的苑瓊丹坦言不怕扮醜,更認為一個演員能被標籤是很難得。講到星爺,苑瓊丹指對方並不惡:「最初合作,佢唔會阻你,先畀你發揮做一次,之後佢會做一次畀你睇,畀你copy,我成日話周星馳唔係人,係神!因你永遠模仿唔到佢嘅喜劇節奏。」

苑瓊丹於上世紀90年代在影圈發展順暢,但在1995年突然簽約無綫,由大銀幕跳返公仔箱,原來是演技遇上樽頸位,她透露當時要拍一幕好多急口令的戲,但不斷NG,星爺叫她拍口型就算,但導演王晶拒絕,令苑瓊丹面紅得想躲起來,最後令她覺悟,要返電視台重新鍛煉演技。後來苑瓊丹因拍攝《皆大歡喜》爆出演員不和事件,令她2012年離巢北上發展,她坦言因為唔開心而走:「我接受唔到事件發後,隨之而來有好多陷阱,要面對好多黑暗,係好恐怖!之前拍戲我好開心,但事發後我每日放飯都係匿喺化妝間,唔想面對!當時我仲諗過退休唔做!」而她今年過檔奇妙「開電視」主持《開工大吉77》,專訪久違的圈中好友,當中包括羅家英、吳浣儀、艾威、鄧兆尊和尹天照等。

-----------------------------

《蘋果》英文版免費試睇:了解更多

英文版已登錄《蘋果》App,立即下載/ 更新iOS / Android

-----------------------------

支持蘋果深度報道,深入社區,踢爆權貴,即Like蘋果專題及調查組FB專頁

娛聞樂陪你走遍全球追星,即Like「娛果」FB 專頁!
BannerBanner