王宗堯新戲審批需時被刪戲 《佔領立法會》望正規戲院放映

更新時間 (HKT): 2020.10.31 20:26
(蘋果日報)

本土電影《十年》、《理大圍城》和《地厚天高》今日在灣仔藝術中心舉行放映會,《十年》其中一個單元《自焚者》導演周冠威、《地厚天高》發行人的崔允信、以及演員王宗堯都有出席。

有不少本土電影也因立場和題材,而未能安排在戲院上映,而王宗堯主演的社會題材電影《夜香‧鴛鴦‧深水埗》慶幸能排期在戲院播映,該片還有林耀聲、顧定軒等人演出,下星期會舉行優先場。問到是否慶幸電影能上映?他說:「都想有戲畀觀眾睇,無論乜嘢題材同訊息都想畀人睇到。」經過一輪審批,他表示除了當中有紀錄片環節,關於深水埗區議員選舉的故事和自己有關的,都令審批需時,被問電影有否因此刪減其戲份?他說:「少少都有嘅,或者有啲改動,套戲喺前面加警示字句。」將來會否自導拍紀錄片,他表示會有困難:「一來呢排冇乜社會事情發生,而且相對地難搵演員演出,題材都可能敏感。」

專門推廣本土電影的崔允信,被問到其他本土電影如《佔領立法會》及《理大圍城》未能在戲院排期上映,崔允信說:「大家問吓戲院,其實係有傾過,唔係由呢兩套開始,《時代》上映都有問題。」他表示仍相信有日能在正規院線上映,所以不會安排網上播放,他說:「因為電檢處出現警號,要加入警示,但我哋啲戲係合法,拍嘅人同睇嘅人係合法,唔似得以前中國要走去地下放映。而家係院線要考慮,但我哋會堅持。」而且他也不想在其他細場地播映,因不想標籤有某部份題材只能在大戲院播放,或有某一類題材則在其他場地看到,他說:「呢啲電影都係香港電影工作者嘅成果,亦唔想太highlight某部份場地,若只係靜雞雞播係冇意思。」

此外,周冠威表示由剪輯到每次放映會,他已經看過很多次《十年》,每次也會有不同感受。他分享去年8月5日,仍記得當天社會有三罷行動,電影《十年》舉行放映會,遇上現場有集會,他說:「有啲示威者之後嚟咗睇戲,套戲每次睇都好大感受,有好多片段都係唔想見到嘅將來,唔想見到嘅,真係好心痛,戲入面有防暴打主角,當時仲諗係咪太激呢個畫面,但如今睇新聞、網上片段經常睇到畫面,而家如生活一部份。」他心痛於社會上抗爭的人,為公義、自由而犧牲自己。

在放映分享會上,部份電影題材敏感,問到稍後可會再寫有關社會性題材,他承認有劇本寫作中,但未找到投資方,他說:「我想寫有關2019年社運嘅戲,如果冇投資,或者搞眾籌、搵人捐錢之類。」至於會否多拍商業戲賺錢用來投資社運電影?他笑說:「所以我拍咗《幻愛》》囉!」

-----------------------------

《蘋果》英文版免費試睇:了解更多

英文版已登錄《蘋果》App,立即下載/ 更新iOS / Android

-----------------------------

支持蘋果深度報道,深入社區,踢爆權貴,即Like蘋果專題及調查組FB專頁

娛聞樂陪你走遍全球追星,即Like「娛果」FB 專頁!
BannerBanner