林熹瞳補擺婚宴Sweet爆咀老公 戴140萬鑽飾晒行頭

更新時間 (HKT): 2020.10.31 23:03

現年36歲的「怪談女」林熹瞳(Rachel)在本月1日與拍拖3年、40歲任職腕錶品牌經理的男友何思哲(Carson)於佐敦一教堂行禮,今晚在九龍塘補擺婚宴。Rachel身穿一條銀色開胸晚裝,戴了一對鑽石耳環、鑽石頸鏈、鑽戒、求婚戒指和結婚戒指,合照時,Rachel和老公應記者要求咀嘴。

Rachel望住老公笑說:「記者知道你叫咩名,你以後要小心啲,好多人會幫我睇住你㗎!」她更開心透露總值140萬元,共30卡的鑽飾獲客戶贊助,而老公送的求婚戒指都有2卡幾,Carson說:「心意,最緊要追到老婆返嚟,好難追㗎!」Rachel大讚老公是暖男,Carson亦讚老婆是暖妻,兩人表現十分恩愛。

Rachel表示已習慣婚後被叫何太,並坦言婚後很開心:「感覺係我而家已經有咗老公,同埋結咗婚之後愛佢多咗,覺得呢個人係陪我走成世,我唔需要再揀,佢好顧家,因為我本身係一個冇安全感嘅人,好想有一個屋企,佢係完全畀到我,好多家庭活動,同老爺奶奶出去玩。」問到Carson對太太的承諾?他說:「愛佢一生一世,做個有承擔嘅男人,愛佢之餘仲要愛埋佢屋企。」Rachel透露擔心年紀太大,影響生小朋友,所以婚後會趕「造人」。

由於受武漢肺炎疫情影響,以致婚宴人數有所限制,Rachel表示已減少人數,按照規定6人一枱,就連度蜜月亦受影響,今年會不成行。

婚宴上,黃芷晴、李日朗均有到賀,而原本由鍾健威和女友黃美棋一起擔任婚宴司儀,但黃美棋因工作關係而未能出任,鍾健威說:「因為4月hold咗期,然後8月再10月,改過好多次,今次真係唔得。」問到婚宴上有甚麼特別環節?鍾健威說:「新郎哥追Rachel嘅時候,曾經講過『我唔係要你做我女朋友,我係要做你隻兵。』其實好sweet,所以準備咗件印有『兵』字嘅衫畀佢唱歌嘅時候着。」經常擔任婚宴司儀的他,原來已有結婚的打算,但很多計劃被疫情打斷。

此外,黃芷晴表示準備了一封信給Rachel答謝對方:「佢好支持我,好朋友兼舊同事,成日食飯見面,見到佢結婚,我覺得好開心。」她透露最近報名學插花:「呢個唔預爸爸(黃日華),不過我哋報咗蠟燭嘅證書班。」她稱現時已投入工作,還有首飾網上生意,會否開實體店?她說:「本來諗住開,但今年唔夠膽開。」

-----------------------------

《蘋果》英文版免費試睇:了解更多

英文版已登錄《蘋果》App,立即下載/ 更新iOS / Android

-----------------------------

支持蘋果深度報道,深入社區,踢爆權貴,即Like蘋果專題及調查組FB專頁

娛聞樂陪你走遍全球追星,即Like「娛果」FB 專頁!
BannerBanner