MIRROR單飛戰將丨阿Jer《物語》三部曲想為廣東歌出分力 AK想齊人拎晒新人金銀銅

更新時間 (HKT): 2020.11.04 08:15

柳應廷(Jeremy/阿Jer)是跳唱組合MIRROR成員,「而我不知道柳應廷是誰。」這句似曾相識的形容,曾被網民加諸在阿Jer身上!

阿Jer前年參加《全民造星》真人騷30強止步,幸運地被監製花姐賞識其音樂才華,順利加入MIRROR,組合至今成立2年,一直不起眼的阿Jer終憑實力發圍。去年MIRROR以姜濤和陳卓賢(Ian)打頭陣,有個人單曲派台,今年組合後勁有力,輪到江𤒹生(Anson Kong) 、盧瀚霆(Anson Lo)及阿Jer接棒單飛闖樂壇。27歲的阿Jer其貌不揚,卻被fans形容為隊中「主唱擔當」,個人單曲派台後憑悅耳聲音打動人心,在香港樂壇新人中有新鮮感,加上他的系列MV拍攝取材以港人港景港聲製作,充滿本土文化色彩。

阿Jer日前夥拍AK接受《蘋果》專訪,兩位新血能歌善舞,發揮自彈自唱冧功。今年阿Jer先後推出物語系列三部曲,以《水刑物語》開始,接着《迴光物語》,最終以《風靈物語》畫上句號,二部曲《迴光物語》更登上903專業推介榜冠軍,成為近20年來第8位首年出道即登頂的歌手。MIRROR中又有一實力唱家班跑出,還得到網絡紅人King Jer加持,高度讚揚他今年新人獎在望,不過有網民狠狠潑冷水,直言「唔識佢」、「乜水」、「係咪香港樂壇已死」。首次榮登冠軍歌有彈有讚,阿Jer謙虛表示:「我有睇好多意見,新人有人唔識係好合理,始終我哋又唔係好勁,我出咗3首歌,慢慢行。」他沒料到會打上冠軍榜,自知作為新人遭受抨擊並無唔開心︰「若出道好多好多年,人哋仲問邊個係阿Jer,咁就會唔開心。」

對比之下,其他隊友先行跑出,相反阿Jer擁有得天獨厚靚聲,有實力卻輸在起跑線,度過了一段被視作透明人的歲月,現終捱出頭來浮上水面,身旁的AK力撐好兄弟:「我睇到好多讚佢(指阿Jer)留言,新人唔識好正常,我哋出道只係2年,參賽時又係素人,希望更多人透過音樂了解我哋。」阿Jer對首年樂壇成績滿意:「好多樂評同資深音樂人都好支持我哋,我出咗新歌《風靈物語》,Eason(陳奕迅)都有聽,我已好開心,我哋想做到更多人聽廣東歌,咁多人留意MIRROR,係咪要發展好啲廣東歌呢?有出單曲成員都好想為廣東樂壇出多分力,希望獲得支持。」

AK和阿Jer今年會競逐新人獎,再次變成競爭對手,AK笑言:「又唔會喎,因為我首歌《金星女孩》都攞到第2。」兩人希望在樂壇頒獎禮上呈現一個畫面:「最完美可以3人(連同Anson Lo)一齊上台攞獎,唔係嘅話其中一個都可以代表MIRROR去攞呢個獎,冇組合冇我哋,冇MIRROR冇得角逐新人獎,如果有獎,個獎都係屬於咁多位兄弟,想攞獎原因係想將個榮譽送畀幕後。」兩人更憶起姜濤去年獲新人銅獎時,大家有幸觸摸獎座。至於可有信心超越姜濤?AK笑說:「未超越佢,我戶口身家未及佢,所以姜濤仲喺一個位置之上,我想換佢份身家多啲。」

今年ViuTV在節目巡禮中披露加入樂壇頒獎禮戰團,雖然未有確實舉行日期及參賽準則,但阿Jer和AK都想藉此在公司頒獎禮上分一杯羹。

撰文:卓寶花

攝影:陳慧安

攝錄:馮嘉銘

化妝:AK、Jer(Giann Tifa@Annie G.Chan Makeup Centre)

髮型︰Man Chan@Chic Private I Salon

場地:wahaha partyroom

-----------------------------

《蘋果》英文版免費試睇:了解更多

英文版已登錄《蘋果》App,立即下載/ 更新iOS / Android

-----------------------------

支持蘋果深度報道,深入社區,踢爆權貴,即Like蘋果專題及調查組FB專頁

娛聞樂陪你走遍全球追星,即Like「娛果」FB 專頁!
BannerBanner