葉玉卿母女投票撐特朗普 無懼死亡恐嚇:做人唔需要虛偽

更新時間 (HKT): 2020.11.05 14:20

美國大選全球矚目,移居紐約多年的葉玉卿履行公民責任,且舉家都投票給特朗普(Donald John Trump),卿卿的21歲女兒芷欣亦曾在IG分享睇法,今早芷欣上載拿着支持特朗普海報的相片,留言指收到死亡威脅,她強調只是分享自己的信念。

對於女兒受到網絡欺凌,卿卿接受《蘋果》訪問表示:「我個女21歲,今次第一次投票,好多人唔夠膽講自己支持邊個,尤其係我哋係共和黨,支持Trump,因為民主黨嗰邊好激進,郁吓要生要死,所以都好怕。佢掙扎咗好耐,今次表白出嚟,受到好多攻擊,有啲係唔識嘅人,有啲係以前學校朋友,佢哋好激進攻擊佢:『你投Trump呀,咁你係種族歧視者,尤其是你係中國人,Trump歧視中國人,你點解要投佢?』」

卿卿認為今次事件,對女兒是好經驗,可以看出朋友的真面目:「我叫佢禮貌回應,做人唔需要虛偽,唔需要忍氣吞聲,只要講嘅嘢有道理,唔係傷害人咪得囉,但而家反過嚟變咗好多人傷害佢,如果太離譜話要殺你,我叫佢即刻刪咗去,佢咁大個女識處理。」

對於美國大選,支持特朗普的卿卿說:「其實邊個輸贏,到最後都係國家嘅命運,都係要面對,好似冠狀病毒,都冇人諗到會發生,但發生咗,唔止搞慘好多人,搞到Trump都好慘,因為首當其衝,變咗大藉口攻擊佢;平心而論,過去4年佢都做得唔錯,佢係講嘢衰啲囂張啲,有時講嘢唔留餘地,好直接,唔係典型政治家,但佢應承咗嘅嘢,講出嚟大部份都有做到,我都好佩服佢嘅魄力,佢對國家前途嚟講係好嘅,但好多年輕人俾IG、FB蒙蔽晒,完全抹殺佢嘅功,只係製造好多攻擊佢嘅消息。」

由於投票給特朗普遭抨擊,卿卿說:「成日話你哋黃種人,我話你同我同佢冇分別,如果你睇到有顏色,係你有種族歧視,佢話你都係有顏色種,點解要幫Trump,其實Trump根本冇歧視,佢只不過針對件事,呢個病毒喺中國傳嚟,唔係話中國人傳過嚟,唔係咁解,美國係民主國家,梗係同共產黨唔啱,佢唔係針對種族,只係針對國(共產黨)。」

為人真性情的卿卿,坦言一家都是共和黨,但很民主,「美國本身係言論自由,只要你唔係攻擊人,可以發表自己意見,我覺得喺美國冇話本土人,除咗印第安人真正係本土,其他全部都係坐船移民嚟,我哋從來冇睇乜嘢顏色,我覺得成日講住顏色先係種族歧視,我個女本身喺度長大,從來冇睇顏色呢樣嘢,所以佢冇咁諗,黑人都好講道理。其實我哋又冇話乜嘢,支持還支持,最後結果係點樣都要接受,冇話要去抗議、暴動,我覺得任何嘅事,無論結果係點樣,大家都要理性,喺美國其實已經有好多講人權、優惠待遇,唔會話餓親你,唔會有病冇得醫,其實美國對一般人嚟講已經好好。」

讀者都留言讚卿卿:「原來佢好硬朗,勝過好多男子。」、「內外都美麗的明星!比現在很多所謂藝人更有腦。」、「真正有樣有身材有智慧的女神」、「卿卿從來都醒目又理智,讚!」、「香港人夢醒得太遲了,應該學你哋咁,早些部署移民。」

-----------------------------

《蘋果》英文版免費試睇:了解更多

英文版已登錄《蘋果》App,立即下載/ 更新iOS / Android

-----------------------------

支持蘋果深度報道,深入社區,踢爆權貴,即Like蘋果專題及調查組FB專頁

娛聞樂陪你走遍全球追星,即Like「娛果」FB 專頁!
BannerBanner