劉志榮遺孀設靈丨梁淑莊圓願與亡夫團聚 潘冰嫦備耳環及香水陪葬

更新時間 (HKT): 2020.11.08 18:59
(蘋果日報)

已故亞視一哥劉志榮的遺孀、麗的及亞視前花旦梁淑莊(莊姐),上月2日因胰臟癌病逝,享年73歲。其子劉健樂今日在紅磡世界殯儀館為亡母設靈,晚上7時半舉行追思會,莊姐的靈柩明天將移送長沙灣天主教墳場安葬。

靈堂設置了大屏幕播放莊姐生前演出片段,家屬特別印製了一本紀念冊,有圈中好友及家人撰寫的悼文,包括了汪明荃、鮑起靜、黎燕珊、謝雪芯、葉家寶、徐小明等人,今晚追思會儀式由汪明荃、徐小明、劉緯民負責致詞。

劉健樂表示:「今日為媽咪做最後一件事,媽咪闊別娛樂圈好耐,多謝大家對佢嘅關心,自從媽咪失去爸爸之後,佢身體偏向虛弱,情緒好波動,花好多時間至走出陰霾,不過身體同命運好難控制。」問到媽咪的遺願?劉健樂指媽媽最希望兒子健康快樂,最大心願是和爸爸夫婦團聚,她離開前一個半月才確診,醫生指癌細胞早已潛伏身體內,自爸爸離開後便患了抑鬱症,近年才釋懷,雖然身體較弱,但一直沒大問題,今次離開得太快,可能是媽媽的福份,承受的痛苦亦比較少。

此外,黎燕珊、潘冰嫦、歐錦棠夫婦、鮑起靜、安德尊、黃夏蕙、甘國亮、汪明荃、徐小明等圈中好友出席喪禮弔唁,而不少圈中好友,包括羅蘭、劉松仁、森森和斑斑姊妹、胡楓、薛家燕、陳曼娜、毛俊輝及胡美儀夫婦等亦送上花圈悼念。

潘冰嫦表示:「讀麗的第四期訓練班同佢係同學,佢讀書好叻,當時都以佢為學習目標,大家感情好好,係金蘭姊妹,自從佢老公走咗之後佢就有抑鬱,經常喊住同我傾偈,近年叫做心情好返啲,識得開心講笑,可惜喺10月2號收到佢個仔健樂嘅電話通知,話佢差唔多唔得,今日準備咗佢最鍾意嘅耳環、香水做陪葬品,亦幫手準備佢最鍾意嘅花。」

黎燕珊透露劉志榮生前希望兒子可以成為大律師,而現年31歲的健樂也達成了父親遺願,剛成為大狀,她相信夫婦二人在天之靈亦感安慰。黎燕珊並謂:「聽到好朋友離開嘅消息好唔開心,梁淑莊夫婦人緣好好,所以朋友都一呼百應為佢搞最後一次Party,自從劉翁(劉志榮)走咗之後,佢心情一直都唔好,淚水10幾年嚟都冇停過,近年唔知點解好低調,約極佢都唔出嚟,一向知佢好掛住劉翁,今次離開,希望同劉翁團聚,我哋一班好姊妹會睇住健樂。」

-----------------------------

《蘋果》英文版免費試睇:了解更多

英文版已登錄《蘋果》App,立即下載/ 更新iOS / Android

-----------------------------

支持蘋果深度報道,深入社區,踢爆權貴,即Like蘋果專題及調查組FB專頁

娛聞樂陪你走遍全球追星,即Like「娛果」FB 專頁!
BannerBanner