林耀聲隻身闖瑞士拍電影 演繹《造口人》為角色嘆奈何

更新時間 (HKT): 2020.11.12 08:00

演員是孤獨的,於水銀燈下披上別人的皮囊,演繹他人的生命。活在虛幻又美麗的氣泡,外頭的人只有羨慕的份兒,卻不知道演員其實是在燃燒自己。五年前,林耀聲懷着恐懼不安,隻身跟隨劇組到瑞士,在陌生的國度演着別人的生命,他說:「係我演過最沉重嘅角色,不過揀多次嘅話,我都會再拍。」

林耀聲由參演首齣電影《烈日當空》至今已入行十三個年頭,其間拍攝十多齣電影,參演過廿多部劇集。對於外界,他的名字不算陌生,但還未算名成利就;他有自己的光芒,卻暫未能獨佔鎂光燈成為大眾眼中的唯一主角。林耀聲日前在旺角為宣傳電影《造口人》接受《蘋果》專訪,眼前這位外貌俊俏、擁有健康膚色的男人,笑容親切、禮貌周周,拍攝經驗豐富的他,面對鏡頭竟然還有點羞澀的男孩模樣,與那些在娛樂圈打滾十多年的老江湖味,完全沾不上邊。

《造》是五年前拍攝,林耀聲說:「故事係講男男意識攝影師李志超(Julian)嘅抗癌故事,因為『我』患咗腹膜癌,屋企人唔理解、情人亦同『我』分開,過程入面好多唔開心。可惜,我冇接觸過Julian,惟有自己上網search,導演(洪榮杰)就帶我去悼念Julian嘅活動。嗰時啱啱拍完《點五步》,之後就出發去瑞士開工,不過因為我英文程度唔太好,食飯、搭車、臨瞓前都狂讀啲對白,自己做好晒繙譯,用咗兩個月時間做功課。瑞士,對我嚟講係完全陌生嘅環境,仲用埋當地crew,啲人又唔識,又唔係太溝通到,成件事真係好不安同恐懼。導演畀咗個任務我,嗰個半月埋位前後,都要黐住個造口袋,用Julian嘅角色去生活,唔想cut咗機就做返林耀聲。因為『我』當時唔可以企直個人,所以每日喺條腰黐住條大膠紙,令自己企唔直。」回想當時,巨大的心理壓力及焦慮,他仍然歷歷在目:「真係我演過最沉重嘅角色,嗰個半月勁唔開心,喊足個半月。越睇劇本,越覺得天妒英才,『我』咁叻,點解會咁?」

Julian後期要以造口人身份生活,為了演出對方的感受,林耀聲除了閱讀他的作品,亦了解造口人在生活上的困難:「個造口袋係負責收集排洩物,佢係自動排洩,即係隨時隨地都有機會排,可能會有滲漏、有氣味,如果清潔得唔好,身體仲會發炎,要即刻入醫院。黐住個造口袋嗰陣係十級恐懼,如果人哋問我,我唔識點答。導演話有次去探Julian,佢啱啱做完手術,但係好好中氣,喺走廊頭講嘢喺走廊尾都聽到,咁有活力、咁認真工作,對人咁真誠,點解後期會咁呢?我就係帶住呢啲問題去演。」雖然是五年前的演出,林耀聲仍然如數家珍憶述種種,他自嘲當時的演出較青澀,現時的他最想做反派:「好多人都話我個樣正氣,但係都可能得㗎,做斯文敗類囉。」

林耀聲多年來演過不少小眾角色,例如同性戀者及易服男等,他說:「我覺得佢哋都係普通人,都有權去愛同被愛,點解要標籤佢哋呢?作為演員,做每個角色都有訊息想帶出嚟,希望透過角色,令大家明白佢哋面對嘅壓迫同歧視,從而更加了解佢哋。」無論是經典永恆的哥哥張國榮,還是剛冒起的台、泰小鮮肉曾敬驊、陳昊森及Bright,亦曾演過同性戀角色,林耀聲說:「如果講最想合作,一定係我由細到大嘅偶像哥哥,佢係經典,《春光乍洩》我睇咗最少五次。記得佢喺訪問入面講過,做藝人要姣靚型帥,我真係好想喺現場感受到佢嘅姣靚型帥。Bright嘅感覺好似好難親近,可能加埋語言不通啦;曾敬驊同陳昊森感覺上會nice啲,哈哈。」姣靚型帥,相信是他的目標,而眼前這位擁有陽光大男孩外型、說話率真羞澀、對演戲的興奮認真,配合得恰如其份,築起正等待着成為焦點的演員——林耀聲。

採訪:盧妹

攝影:葉君海

化妝:Tammy Au Makeup

場地:BOS VINCI

-----------------------------

《蘋果》英文版免費試睇:了解更多

英文版已登錄《蘋果》App,立即下載/ 更新iOS / Android

-----------------------------

支持蘋果深度報道,深入社區,踢爆權貴,即Like蘋果專題及調查組FB專頁

娛聞樂陪你走遍全球追星,即Like「娛果」FB 專頁!
BannerBanner