張繼聰自爆太太謝安琪分配零用錢:我有廉恥唔敢要求太多

更新時間 (HKT): 2020.11.15 09:00

張繼聰今年正值男人「黃金40」,既為人夫兼人父孭起頭家,一家四口溫馨快樂。憶起2、30年前塵往事大不同,「富足」令阿聰變得心靈富有,「夠皮」令他知足常樂。哪怕曾被冠上「女尊男卑」之名,現在他已變成強而有力臂彎夠擔當。阿聰和太太謝安琪(Kay)早早選擇建立家庭,長子張瞻已經13歲步入青年期,3歲妹妹張靖(KaKaBall)日漸長大,阿聰經常拖着前世情人得到慰藉。尤其疫情下令他深深體會珍惜家庭樂,不僅對子女管接管送,又會載太太坐電單車遊車河,夫妻感情保鮮有妙法。

早年阿聰從樂壇轉戰電視圈發展不俗,因合約問題停滯,打擊反令他因禍得福,在大銀幕密食發展,過去3年高峯期曾1年接拍6套電影絡繹不絕,感覺充實。過往拍劇時一星期未必見到子女一次,阿聰憶起馬拉松式生活:「好似揸夜班的士,返工時個個屋企瞓覺,放工返嚟,佢哋又未起身,我瞓個零鐘又出去開工,家庭變得好似同屋關係咁囉,但永遠又見唔到佢哋咁,都辛苦㗎。」 飽歷艱辛阿聰仍多得電視台磨練,令事業更多機遇,以至近年主力拍電影,完全體會兩種模式:「工作時間可能短啲,但做功課要多啲,因為濃縮到個半至兩個鐘,要好精準,仲要觀眾買飛入場,唔同階段有唔同享受,以前電視台都享受,不停做戲,除咗斷片嗰刻你都不停拍緊戲,都好玩。」

最近阿聰為有份主演的電影《逃獄兄弟》宣傳,他飾演一位有情有義獄中黑手,夥拍張建聲、栢天男等齊齊驚險逃獄,有不少打鬥場面,阿聰經常為角色犧牲變肥變瘦,幸好今次不用騷肌,可以盡情欣賞栢天男body:「當時要為另一電影準備,係人生最脹時候,望落一嚿肉咁,大家睇栢天男睇到流晒口水。」回看戲中片段還自嘲:「呢個大肥佬邊個嚟?跑跳時好論盡。」

在鏡頭下阿聰擅長發揮搞笑一面,原來有苦自己知:「有邊個唔想做型佬?做做吓人哋又覺得搞笑,建立咗喜劇形象,人哋睇我做戲開心係成就。」太太視覺又如何呢?阿聰說:「我梗係想佢覺得我好型又好靚仔而同我墮入愛河啦,呢方面都係做唔到,但起碼開心先囉。」兩人均是圈中人,但絕少夫妻或親子檔上陣掘金,阿聰不想子女步他後塵:「一直有好多邀請,我暫時唔想,小朋友唔知幕前係咩工作,我自己童星開始,小朋友會攰唔想做,導演或PA助導唔會鬧個小朋友,只會同家長講唔該搞掂佢,小朋友會唔明白或唔想,我唔想逼佢哋。」至於夫妻檔合作,阿聰有另類想法:「我同太太就真係冇,除咗新人時,而家佢音樂,我電影為主,我會諗有冇人想睇?兩夫妻一齊做戲要睇劇本,見到觀眾對我哋既定形象,可能有幫助,唔係的話叫我哋演同事,好難投入喎,唔係幫緊個戲,所以冇呢個特別諗法。」

阿聰轉戰影圈發展托賴收入一直滿足,講到多少他則說:「有人1億都唔夠,有人一個月10萬好正,我算係咁,養到屋企,想買嘢又負擔到,富足,定義唔係戶口有幾多錢,而係你想做一啲嘢有能力做到,唔止關錢事。下下睇住戶口有幾錢、搵幾多錢都好貪乏狀態,好多人食幾世都食唔晒,但都唔夠要搵,因為覺得自己冇囉,所以我冇諗咁多,搵幾多錢都係老婆睇,從來都冇問有幾多個零。」密食之下分分鐘超越太太收入?阿聰笑說:「咁一定佢贏啦,我搵錢係佢,佢搵錢係佢,佢永遠最有錢,我耐唔耐問佢可唔可以過啲零用錢嚟買吓電單車,太太好好有商量,不過佢會話『又買?』,我自己有廉恥唔敢要求太多,夠皮就知足常樂。」

近年阿聰沉迷新寵古董電單車,享受男人的浪漫,喜歡vintage感覺,他說:「揸電單車唔同坐車感覺,唔怕塞車唔怕搵路行,可以用另一角度欣賞香港靚景,發現好多路都好正,仲會聞到戶外氣息包括樹木、麵包味道,重新認識香港,好正。」阿聰現時擁有3輛古董dream car,其中一架常出巡的古董車超過十萬元,還要加工保養,可謂價值不菲。

採訪:卓寶花

攝影:林賓尼

場地:JAS Party&Studio

-----------------------------

《蘋果》英文版免費試睇:了解更多

英文版已登錄《蘋果》App,立即下載/ 更新iOS / Android

-----------------------------

支持蘋果深度報道,深入社區,踢爆權貴,即Like蘋果專題及調查組FB專頁

娛聞樂陪你走遍全球追星,即Like「娛果」FB 專頁!
BannerBanner