爆相爆片|無綫劇《拳王》遭投訴封路現車龍 有人大嗌:走啦!

更新時間 (HKT): 2020.11.23 00:30

無綫多次被人投訴霸街拍攝,《蘋果》昨日收到讀者陳小姐透過「爆相爆片」投訴,指中午12時許,無綫新劇《拳王》的攝製隊在觀塘駿業街封路,由於另外兩旁位置都泊滿車,唯一的行車線被封,令後行車輛受阻,有警員到場了解。

據了解,該場口有張振朗、朱敏瀚和蔡潔三位演員,講述蔡潔在路中心截停車輛,其間手舞足蹈,情緒激動。攝製隊由下午12時許開始擺機,現場聚集大批工作人員,並設有高層鐵架放置攝影機。讀者陳小姐說:「平時呢段路好塞車,但周六日假期較好,最多都係駿業街燈口位等1、2分鐘。但今日1點左右,我同朋友揸車經過,等咗差唔到10分鐘郁都唔郁,前面啲車不停響安,最初仲以為有交通意外。」陳小姐後來落車了解,見兩、三名警員上前向劇組查問,她續說:「我有問警察,佢哋話冇申請,處理緊,但見佢哋問咗一陣,5、6分鐘又走咗。」

劇組繼續拍攝,陳小姐飯後再經過,從高處拍攝到的片段見到車龍有8、9架,隱約聽見有人大嗌:「走啦!」陳小姐表示不清楚是市民還是劇組人員大嗌,但對無綫封路十分不滿:「我住附近,知道上星期都封咗偉業街,但當時有申請,因為見到有牌指示,咁自己都識走位兜路。但今次雖然間中有放行啲車,但成個鐵架放喺馬路,入咗去冇得走,真係好激氣,點解你要阻住其他道路使用者。」

下午近5時,《蘋果》到現場了解,見到張振朗和朱敏瀚完成拍攝後一齊離開,被問到被指阻街,張振朗說:「唔知道,我哋喺24座,唔知發生咩事。」然後便各自取車離開。《蘋果》亦向警察公共關係科了解,表示未有接獲有關拍攝引起之任何投訴,而警方則在較早前已接獲相關拍攝的通知。

-----------------------------

《蘋果》英文版免費試睇:了解更多

英文版已登錄《蘋果》App,立即下載/ 更新iOS / Android

-----------------------------

支持蘋果深度報道,深入社區,踢爆權貴,即Like蘋果專題及調查組FB專頁

娛聞樂陪你走遍全球追星,即Like「娛果」FB 專頁!
BannerBanner