舞台劇腰斬丨觀眾急撲特別場門票 陳國邦羅敏莊排隊撐:港人好有人情味

更新時間 (HKT): 2020.12.01 16:26

鑑於武漢肺炎不明源頭的確診個案數字近日在本港急升,昨日歌舞群組再多40人確診,群組累計約520人受感染,林鄭月娥宣佈收緊防疫措施,政府表演場地明日起需要關閉兩周。舞台劇《新聞小花的告白2白屋之夏》正在葵青劇院演藝廳演出,對於舞台劇被腰斬,劇團創作總監梁祖堯昨日在社交平台出post反問:「我哋又做錯過甚麼?

今日風車草劇團加開特別場,觀眾要親身排隊購票,劇團趕在限期前再開一場。據工作人員透露,今早7時已有人開始在葵青劇院外排隊,為免人群聚集,大會決定用派籌形式,將買門票人士分隔,即一個籌一張門票,所以每人最多獲派四個籌,而他們等候購買門票時,人與人之間亦要保持社交距離。兩小時內已火速售罄場內75%門票,大會均表示很感動。

休假觀眾急撲飛

原本買了下周一門票的湯先生,他知道有加場,所以親自前來買飛支持,他說:「噚日政府宣佈劇院要關門,見到梁祖堯出post話有加場,所以特登趕過嚟,自己本身work from home,今日放假。政府推行限聚令係好,咁多次嘅疫情爆發,都唔係佢哋(劇界)做主因,好似舞台劇從來都冇爆發過群組,就連戲院都要被迫關閉,所以有時政府做嘅政策係有啲問題,知道有人打算唔退票,支持劇團都係一件好事,喺疫情下一種同舟共濟。」至於觀眾簡小姐表示:「知道有特別場,所以過嚟買,因為我而家冇嘢做;其實政府推出嘅防疫政策係有啲急,臨時臨急話要停就停,始終係人哋一番心機,所以知道加場,我就即刻過嚟支持吓 。」

陳國邦趁機撐本土製作

羅敏莊和陳國邦原先欣賞下周一的場次,因為臨時取消,又知道今日會加場,決定前來撲飛:「而家有咩人係有嘢做㗎?個個都好得閒,其實係一個好手足無措嘅情況,佢哋(劇團)都好辛苦,但好彩嘅係佢哋噚日休息,可以做得切今日加場嘅嘢,如果唔係都幾大鑊。見到好多人今日嚟支持佢哋,7點鐘已經有人嚟排隊,我覺得香港人好有人情味、好犀利,原來好多人都支持劇場,好開心。」問到有時會參演舞台劇的陳國邦,會否感受更深?他說:「我諗唔止係舞台劇呢個界別,如果你身邊嘅朋友係做食肆,你都會感受到,所以都已經唔係邊個界別,有機會咪支持返自己本土嘅嘢。」

疫情對他們影響甚大,羅敏莊說:「我噚日拍完最後一日嘅《Chill Club》,呢季已經完,又一個工作已經完成咗,佢哋開第五季又唔需要我,所以之後冇乜其他嘢做,我都OK嘅,我已經做咗三季,但感覺好似俾人裁員,今日聽到有線裁員,我真係覺得好慘。我諗每個行業都有一個好大嘅問題,而家慢慢現出嚟。」現時在浸會大學授課的陳國邦,笑言正等待疫苗。

對於政府的防疫政策,有否一種頭痛醫頭,腳痛醫腳的感覺?陳國邦說:「而家面對呢個對手,呢個病菌,其實全世界都係咁樣,邊個國家、邊個政府唔係見步行步吖?好啲嘅時候就可以放寬啲,多啲確診嘅就要收緊啲,其實我覺得周圍都係咁,所以我唔會覺得邊個做得特別差,當你面對從來未面對過嘅嘢嘅時候,其實係唯有見步行步,我諗疫苗係終極嘅方法,但當然要有效啦!」

Stanley@MIRROR感無奈

男子組合MIRROR成員邱士縉(Stanley)與女友李靜蓮(Alina),Stanley說:「本身我係睇尾場,但好不幸,因為疫情(被取消演出)。」提到要關閉劇院,他說:「我覺得係有啲無奈,尤其是我哋屬於演藝圈,好多人都會依靠舞台劇,或者同工種嘅演藝表演嚟維生,所以係好無奈。我只能說政府收緊呢樣嘢嘅話,就真係唔好有第五波嘅出現,如果要做,我相信有好多人都願意配合,我覺得其他國家可以做到,香港都可以做到。」談及影響收入,Stanley指自己還好,始終電視台員工有固定收入,「如果你係劇團嘅人,或者做兼職,冇表演就冇收入,我相信祖堯係好大影響,好多人都好大影響,無奈我相信冇人想。」他知道有劇團粉絲打算不退票,幫助劇團的營運開支,Stanley坦言感到很有愛。

-----------------------------

《蘋果》英文版免費試睇:了解更多

英文版已登錄《蘋果》App,立即下載/ 更新iOS / Android

-----------------------------

支持蘋果深度報道,深入社區,踢爆權貴,即Like蘋果專題及調查組FB專頁

娛聞樂陪你走遍全球追星,即Like「娛果」FB 專頁!
BannerBanner