趙詠瑤選美入行轉攻網絡做KOL 考教練牌拍片教孕婦健身

更新時間 (HKT): 2020.12.09 06:00

趙詠瑤(Kimi)在2016年因參加ViuTV選美節目《美選D.n.A》而正式出道,其實早年她亦參與過《第三屆FACE UStar校花校草選舉》。現時懷孕8個多月的Kimi早前在觀塘接受《蘋果》專訪,她覺得參與選美比賽,可以增值自己,她說:「我選校花校草嘅時候,大會會教我哋行catwalk、唱歌跳舞,從中有少少得着,知道成功同努力係成正比。」

選美唔係鬥靚

外界一般認為參加選美活動,目的是為了出名、入娛樂圈發明星夢,但Kimi卻不認同,「好多人對選美嘅誤解係,淨係鬥靚!其實每次選美比賽都有才藝嘅嘢,當時我參加《美選D.n.A》去學打拳,挑戰自己之餘又可以學到新嘢,而唔係靠個樣,因為我真係唔係靠個樣。」Kimi真的與眾不同,她在選美期間與圈外男友結婚,她笑說:「我同老公都拍咗拖好多年,本身諗住靜悄悄地結婚就算,後來俾傳媒發現,所以都幾驚訝。」

簽約加盟ViuTV,Kimi獲安排做節目主持工作、拍劇和拍戲,工作量尚算充實,她幸運地得到老公的絕對支持,更會給予不少意見,Kimi續說:「老公覺得我有更多嘅發展,唔好局限咗喺電視台等人幫我去塑造形象、拍嘢,係機會嚟搵你而唔係你去搵機會。當時有朋友搵我合作拍《收嗲啦!八婆》系列,不過後來喺合作上有啲爭拗,於是我就自己出嚟拍YouTube,老公幫我拍片、剪片。」

KOL唔易做

轉型做網絡KOL,Kimi初時主打路線是旅遊,但因為疫情關係,她索性去考取健身教練牌,拍攝一系列健身片,老公則在她背後默默支持,Kimi笑說:「初頭我完全唔識拍,多謝老公幫我,佢仲幫我錄埋VO,令到條片增添好多色彩。」問到平均每月的收入?Kimi說:「好嘅時候可以去到6位數字,但唔好嘅時候,嗰個月得一單半單,所以係好唔穩定。而家有咗小朋友,我本身唔會儲錢,而家都要節制啲。」會否仿效陳智燊和宋熙年以夫妻檔上陣?Kimi笑指:「有試過,但我嘅男觀眾比較多,所以我老公間唔中出現吓就好喇,男觀眾只係鍾意聽佢聲演。」

大肚婆都貪靚

不少孕婦懷孕期間,總有遇到不適,預產期在明年1月的Kimi,表示在懷孕3個月時出現坐骨神經痛的問題,於是她每天做一個強化髖關節(即骨盆與大腿相接的關節)的動作,除此之外,她笑言要做一個靚靚孕婦,當然會注重身形,「想要靚身形,但又唔傷及BB,我通常會做手部同背部嘅動作,強化背部,係可以令懷孕期間會舒服啲。」Kimi指跪在床邊,一邊手拿着一個啞鈴,然後將手拉起,她強調懷孕時,肌肉會流失,所以揀選啞鈴的磅數都要比平時輕。

場地:BCS Studio

-----------------------------

《蘋果》英文版免費試睇:了解更多

英文版已登錄《蘋果》App,立即下載/ 更新iOS / Android

-----------------------------

支持蘋果深度報道,深入社區,踢爆權貴,即Like蘋果專題及調查組FB專頁

娛聞樂陪你走遍全球追星,即Like「娛果」FB 專頁!
BannerBanner