牛年娛樂圈運勢預測|麥玲玲批屬鼠藝人運滯 姓名有木字易惹血光之災

更新時間 (HKT): 2020.12.31 06:00

2020年即將過去,全世界彷彿因為武漢肺炎而變得一片混沌,疫情橫跨整個鼠年,各行各業面對經濟寒冬,就連娛樂圈五光十色的鎂光燈,在疫情肆虐下亦變得暗淡無光。鼠年娛圈停擺,藝人明星要各出其謀甚至放下身段諗計搵錢。不少人對2021牛年寄予厚望,娛樂圈運勢又會怎樣?《蘋果》邀請到堪輿學家麥玲玲,預測2021辛丑牛年娛樂圈的走勢,更會點出哪些生肖容易惹官非;哪些姓氏部首容易有血光之災?港產電影和演唱會又有冇機復蘇?為一眾藝人在疫境下指點迷津。

娛樂圈預測 年長一輩易惹是非

玲玲師傅指牛年雖然是藝人辛苦之年,但有得做總好過冇嘢撈,她指娛樂圈在未來一年搵錢機會會比鼠年多。她說:「可以睇吓呢個九宮飛星圖,裏面對宮呢個位置,係等於靠口搵食嘅人,好似DJ、唱歌、主持或者前線嘅朋友,會有八白呢個財星飛臨,即係今年機會係多嘅,可以嘗試做不同範疇嘅嘢。」可是,玲玲師傅指未必每個人都會在牛年行運,原來不同年齡層是會有不同際遇。「呢個西南坤位代表媽媽輩嘅人係有三碧是非運,代表容易同人嗌交,即係喺呢個圈做咗媽咪嘅藝人,是非會比較多,同人容易有拗撬,而爸爸輩亦都係麻麻地,有少少失運,反而最理想嘅係後生女,搵錢機會高,另外,後生仔同中年男人都係唔錯㗎,所以話喺娛樂圈當旺嘅,似乎係後生或者30幾40歲會好少少,甘草或者年紀大少少嘅朋友就會麻煩多啲。」

藝人生肖 屬鼠藝人易招負面新聞

玲玲師傅指每年都會有若干生肖犯太歲或沖太歲,其實都只是小事,只要懂得催吉避凶便可,反而最驚係合太歲,生肖屬鼠的藝人就要多加注意了。「喺牛年裏面,犯太歲嘅生肖有5個,屬牛係本命年,屬羊係相沖年,另外屬龍、屬狗同屬馬嘅朋友,都係犯太歲,不過藝人嚟講,唔係好怕犯太歲,通常本命年容易情緒低落啲,相沖年反而唔驚喎,因為藝人通常走嚟走去動盪啲,屬羊嘅朋友係相沖年,但藝人其實係唔怕沖嘅,因為娛樂圈一沖反而係沖喜咗,容易攞獎,所以屬羊係好嘅,屬牛本命年都有進步空間,至於其他犯太歲,好似屬龍、屬狗同屬馬朋友只需要留心啲是非口舌嘅嘢就冇問題,反而生肖最多問題、最驚係合太歲,即係屬老鼠嘅,藝人最驚就係合太歲,合太歲嘅年份,會有負面新聞,亦容易傳出唔好消息或者做起嘢上嚟一波三折,所以呢類朋友,最好多啲走動、結婚、添丁和買樓都係得。」

藝人姓名 有木字邊易有損傷

藝人要拍戲拍劇容易整親扭親,嚴重的甚至要入醫院。玲玲師傅指有木字部首的藝人,在牛年要多加留意自身安全。「牛年係辛丑年,天干係金,地支係土,逢係名字入面有木字喺旁,例如姓楊、姓李或者名字多木多草花頭嘅朋友,由於受到金克制,金木相剋,所以容易受傷整親,扭親呢啲都要特別小心,相對上,如果你本身個名已經金旺嘅,譬如姓劉、姓鄭或者名字入面比較多金嘅朋友,喺我哋嚟講今年係叫做入運啲,會較容易出名。」

娛樂圈機會 帶貨直播大行其道

娛樂圈各行各業在鼠年統統靠鹽水吊命,展望牛年,玲玲師傅指歌、影、視未必有顯著改善或進展,相反在疫情下,藝人的另類收入更為可觀。她說:「大家都覺得鼠年娛樂圈好辛苦,嚟緊牛年又係點呢?其實牛從來比較勤力,換句話說,下年娛樂圈都會衍生咗好多唔同嘅做法,兼且財星到,多多少少代表一啲商業嘅嘢,好多朋友做緊一啲藝術前線嘅嘢之外,會做一啲生意或者喺網站賣嘢、帶貨,牛年雖然話係辛苦,但係都係代表住能夠勤奮努力就會有唔同嘅機會。」

娛樂圈事業 小品電影殺出重圍

鼠年演藝事業被疫情打到落花流水,不過據玲玲師傅表示,牛年娛樂圈運勢會較鼠年佳,尤其小品式電影更會被睇高一線。「因為有財星到對宮,即係以口搵食嘅行業或者做前線嘅人會好啲,就算電影行業都會好返啲,不過電影嘅片種,喺牛年嚟講,唔會係大片當道,反而係小品式嘅片種,好似文藝片或者成本低嘅愛情小品,容易勝出睇高一線。」

藝人做生意 容易蝕錢免得就免

不少藝人有閒錢都喜歡做小生意,藝人開食肆、開美容院比比皆是,不過據玲玲師傅所講,藝人命格其實不宜搞生意,勞神傷財忙完一輪隨時得個吉。「喺我哋玄學上嚟講,藝人多數係傷官食神格,即係用名氣去搵錢,但唔代表做生意特別叻,藝人只可以做一個中間人角色或者掛名做生意,咁原則上係好啲,當你真金白銀做生意,好多時呢啲命格會容易蝕錢,事實我見唔少藝人嘅命格根本係唔適合做生意,尤其係屬老鼠合太歲年份、屬牛本命年或者羊嘅相沖年,呢一類藝人就更加特別要小心,因為真係好容易唔見錢㗎。」

藝人催吉避凶 正南位放鮮花

作為藝人最緊要是有觀眾緣,亦即所謂桃花運。據玲玲師傅所說,想要催旺觀眾緣,牛年要在正南方位,亦即桃花位置擺放多些鮮花或者顏色鮮艷的物件,自然會吸納更多fans。玲玲師傅說:「財位都緊要,好似正西呢個位置,可以放多啲大葉嘅植物或者水種植物,會對自己事業好好多嘅,一般藝人都比較多是非口舌,始終呢個係是非圈,咁是非位置牛年喺西南位,小就會有是非,成日同人哋鬧交,大嘅就容易惹官非,呢個西南位置,盡量唔好放綠色嘅嘢,因為是非位係屬木嘅,水木相生,見到水見到綠色都係唔得嘅,最好放紅色嘅嘢,木生火,呢個位置放一啲揮春又或者放盞紅色嘅燈,都可以化解一啲是非或者官非嘅厄運。最後一個位置係關於名氣運嘅,名氣運係喺正東呢個位置,如果想加強自己嘅名氣運,可以喺正東位置擺放4枝富貴竹,代表步步高陞同名氣都會比較旺㗎。」

-----------------------------

《蘋果》英文版免費試睇:了解更多

英文版已登錄《蘋果》App,立即下載/ 更新iOS / Android

-----------------------------

支持蘋果深度報道,深入社區,踢爆權貴,即Like蘋果專題及調查組FB專頁

娛聞樂陪你走遍全球追星,即Like「娛果」FB 專頁!
BannerBanner