陳卓賢甩底新城頒獎禮 拖混血索模Amy到坪洲「蜜」會斷正

更新時間 (HKT): 2020.12.31 11:22

人氣男子組合MIRROR成員陳卓賢(Ian)日前被爆暗撻「爆粗港姐」陳曉華,之後再傳他成功私有化索模盧慧敏(Amy Lo)和同劇拍檔余潔滢,加上與ViuTV一姐陳俞希及蘇皓兒曾有親密關係,一男5女夠晒熱鬧。

全程不避嫌拖手

周旋5女之間的Ian,被封為新一代靚女收割機,他連日亦刻意避開傳媒,對戀情未置可否。在2020年最尾一日,Ian身邊的真命天女終於正式揭盅。今年27歲的Ian,最終情定與他同屬高頭大馬型兼同齡的墨西哥混血索模Amy Lo。昨日(30日)有《蘋果》讀者何小姐爆料指在下午5時許,見到Ian和Amy Lo在中環碼頭出現,二人更不避嫌全程拖着手,態度親暱。何小姐說:「其實係見到個女仔先嘅,因為見佢好高,戴咗口罩都有啲星味,之後再望吓個男仔,先發覺原來係Ian。佢哋搭下晝5點半船入坪洲,咁啱我又係搭同一班船,見佢哋落船嗰陣有一男一女接佢哋。」何小姐指現場不覺有工作人員在二人身旁,亦未見有攝製隊,估計二人是到坪洲甜蜜拍拖。

拍新劇一吻定情

其實《蘋果》早前已收到一名自稱劇組工作人員爆料,指Ian的真命女友的而且確是Amy Lo。二人在《男排女將》結局中,Amy就以彩蛋姿態出場,有指此乃Ian特意安排她參與。他們在另一部劇集《無限斜棟有限公司》更有不少錫嘴戲,該工作人員指今年9月開鏡時,Ian已不自覺打雀咁眼望實Amy,估計當時他已認定目標打算全力「進攻」。該工作人員又稱拍攝時曾親眼見他們打情罵俏:「佢哋為對方揼骨、餵嘢食,break time兩個自己行開傾偈,要成棚人等佢哋。」

稱拍劇缺席頒獎禮

原本拍拖是甜蜜開心事,可是昨日是新城電台舉行頒獎禮的重要日子,MIRROR 11子齊集上台領取「勁爆組合」獎,惟獨不見Ian的蹤影,司儀指Ian因工作缺席頒獎禮,如今卻被踢爆和女友「蜜」會拍拖而賣甩兄弟。而花姐一直被網民指偏愛Ian,不過愛將為冧女連事業都懶理,唔知花姐會唔會嬲到頭頂出煙呢!

改口因屋企人有事缺席

緋聞纏身的Ian一直未有為事件表態,直到今日凌晨在IG出post,但他仍然堅持不回應私事,原因希望大家可專注他的工作,不過今次涉及他的工作態度,對於被踢爆和女友「蜜」會拍拖而賣甩兄弟,他說:「首先,劇集嘅拍攝一早已經完成,而我請假係早係一個月前請咗,原因係屋企人有事,處理該事嘅時間係同頒獎禮相撞,對外講話係因工作未能出席係覺得關乎我屋企人嘅事無必要公開講太多。我嘅工作態度一直無變,仍然係想做好每一個作品畀大家聽,畀大家睇。祝大家新年快樂!」對於Ian秘密和Amy Lo撻着,MIRROR經理人花姐回覆承認二人正在蜜運中,她說:「Amy同Ian係拍緊拖,新城頒獎禮1400-1600,因撞咗要處理家中私事,所以一個月前請假,謝謝!」

-----------------------------

《蘋果》英文版免費試睇:了解更多

英文版已登錄《蘋果》App,立即下載/ 更新iOS / Android

-----------------------------

支持蘋果深度報道,深入社區,踢爆權貴,即Like蘋果專題及調查組FB專頁

娛聞樂陪你走遍全球追星,即Like「娛果」FB 專頁!
BannerBanner