叱咤頒獎禮丨姜濤首奪我最喜愛的男歌手兼歌曲起雙飛 21歲打破最年輕紀錄

更新時間 (HKT): 2021.01.01 22:47

商台「2020年度叱咤樂壇流行榜頒獎典禮」尾聲,頒發由樂迷投票選出的獎項,現年21歲的姜濤首奪「我最喜愛的男歌手」獎,兼憑《蒙著嘴說愛你》拿下「我最喜愛的歌曲大獎」起雙飛。林二汶首奪「我最喜愛的女歌手」,RubberBand第三度奪「我最喜愛的組合」。

姜濤擊敗了鄭中基、許廷鏗、林家謙和陳卓賢封王,更打破叱咤歷史紀錄,成為最年輕得獎男歌手,當林海峰宣佈姜濤獲獎時,他表情愕然O嘴,MIRROR的兄弟上前擁抱。姜濤上台說:「多謝所有fans、叱咤903、ViuTV、MIRROR...」但未講完音樂已起,姜濤問:「Wow,要唱歌?唔係仲有5秒咩?」嗱嗱臨放低獎項唱歌,唱到一半說:「希望我爸爸快啲好返。」祝福日前中風入的父親,唱完歌再說:「最後多謝大家,多謝所有支持香港嘅樂迷。」

組合at17出道的林二汶,入行19年,現年38歲的她首奪「我最喜愛的女歌手」,擊敗方皓玟、衛蘭、AGA、Serrini獲獎,二汶說:「多謝商台、我諗我坐喺台下好多年,我01出唱片,覺得呢個獎對我最冇可能,呢個獎係最遠,上次at17攞獎over run冇得唱。」接着她多謝《全民造星III》的A組,二汶還說:「2021年我會盡本份做一個好嘅歌手。」在獻唱中途,她說了一句:「多謝盧凱彤。」

RubberBand在林海峰一句「香港人眼睛係雪亮。」下冧莊奪得「我最喜愛的組合」,他們在欠缺隊長阿正下上台領獎,先是阿偉說:「過去一年好艱難,但我哋做咗一張好貴專輯,好多謝一班同我一齊發夢嘅隊友,大家毋忘初心,終有一日成功。」接着泥鯭說:「發夢咗好多年,繼續發夢落去,一定要多謝香港人,呢一年疫情失去好多嘢,疫情之下唔公義嘅有好多,但有希望下大家繼續,香港人加油。」

主音6號感謝完唱片公司後,也向香港人說要加油。他指不少訪問都問到他還可以創作幾多首勵志歌,他指由十幾年前創作《發現號》,之前的《逆流之歌》,到這兩年寫了一首陪伴大家的歌《漫長》,最後他激動說:「今日係我媽媽舊曆生日,佢當時仲喺醫院努力,雖然而家佢已經喺天上,但仍然要祝福香港人同我哋嘅屋企人。」他們唱畢後,接着森美上台講了一句「多謝香港人嘅樂隊。」

完騷後,停車場再聚集過百歌迷,大部份都是等姜濤,拎晒花等住送給偶像,保安最後要加多兩個鐵欄,共3隻鐵欄嚴陣以待,慎防歌迷向前亂衝。

頒獎禮完結後,歌手們陸續離開,過百MIRROR fans守候已久,分別在B1停車場、商場門外等守候,甚至有媽媽輩帶同小朋友見偶像。 至晚上12點左右,但12子之中,只得阿Jer、Alton、Jeremy、Lokman幾人在停車場離開。 由於現場傳言紛陳,姜糖們最終仍不見我最喜愛的姜濤身影,12點半前陸續散去。

-----------------------------

《蘋果》英文版免費試睇:了解更多

英文版已登錄《蘋果》App,立即下載/ 更新iOS / Android

-----------------------------

支持蘋果深度報道,深入社區,踢爆權貴,即Like蘋果專題及調查組FB專頁

娛聞樂陪你走遍全球追星,即Like「娛果」FB 專頁!
BannerBanner