斷捨離,藝人可立刻丟掉的…… 
莊韻澄割愛Hermès銀包

更新時間 (HKT): 2021.01.01 02:00

【娛樂專題】

潮流興斷捨離,周潤發說:「你要咁多嘢做乜,你用唔到喎!」發哥就捨棄了古董車。

人生不同階段,要做出不同的放棄,唔同世代有唔同選擇,今日踏入2021年,《蘋果》訪問了一班50後至90後的藝人,探討他們的斷捨離心法,原來,有人連名牌Hermès都可以斷。

【30+】

錯色唔旺財

39歲莊韻澄:斷捨離一定揀銀包,作為女人好容易因衝動買錯嘢,可能因為顏色同外觀好靚買咗,但其實我已經有銀包,而且唔止一個長銀包,好可惜我買呢個係粉紅色(Hermès),星座小王子話我最好用黑色銀包旺財,𠵱家我又唔用得佢,但買佢又貴(兩萬多元)又唔易買,結果擺咗喺度。

好貴高球袋

37歲陳柏宇:呢個係高爾夫球袋(約1,700元),買完用咗一輪之後,發覺好似好麻煩,之後買咗另一個好用好多,嘥晒啲錢,𠵱家擺咗上去櫃頂,丟又唔係,好似好貴,唔丟又唔係。」跟着問身旁的女兒「係咪呀Abi?」女兒回應「係呀!」

有效降物慾

36歲傅穎:我係非常之鍾意斷捨離,尤其近幾年發現身邊物件越嚟越少,人都變得輕鬆自在開心,少咗出現衝動消費,今次行程帶咗幾本書斷捨離,唔係我會終身收藏嘅系列,睇完mark低重點,我會送畀前枱姐姐,因為佢好好畀我揀房間,可以做貢獻又可以斷捨離,何樂而不為呢!

搶他人之愛

35歲雨僑:有嚿嘢我好想斷捨離,佢係我好努力喺朋友度搶返嚟,佢係一份玩具,畀我個女瞓喺度玩,但我個女完全唔知呢嚿嘢做乜,佢又冇玩過,但呢嚿嘢紮營咁大,又唔捨得丟,好似價值不菲,最大問題係佢走音。

自家製剩貨

35歲張紋嘉:可能你會話斷捨離一件T恤,好似好小事,呢件T恤我冇着過出街,已經十幾年,因為呢件係當年自己出嘅品牌,已經冇繼續做,為咗紀念呢個牌子,將剩貨都留低,丟吓丟吓,只係保留返呢件,不過𠵱家覺得好多嘢留喺心中,會將T恤捐畀有需要嘅人着,放喺衣物收集箱。

妹妹陪襯品

33歲Aka:呢幅磚畫係一位朋友好好心整畀我,用唔同顏色磚仔砌出我嘅樣,呢幅畫跟咗我好耐,但妹妹要搬去比較遠嘅地方,預咗間房嘅牆可以擺相同畫做佈置,問我有冇啲我嘅樣可以畀佢擺,我諗住將呢幅送畀佢當小禮物,有少少唔捨得,但佢係我個妹,隨時可以攞返,希望佢會鍾意。

防疫終結時

32歲龍小菌:我想斷捨離物品係口罩同口罩套,喺抗疫期間大家都添置好多防疫物品,希望呢日快啲來臨,大家可以丟晒啲口罩,健健康康快快樂樂平平安安。

【40+】

棄慢調沖啡

44歲康子妮:人生總有覺得買咗後悔嘅嘢,最近執嘢發現,原來我買咗好多廚房器皿,其中一樣係咖啡壼,我好鍾意飲咖啡,亦上過整咖啡堂,當時上堂買咗呢個壼,形狀好靚,覺得自己會好有時間沖咖啡,慢慢將熱水調校好沖落咖啡粉,結果係冇呢個時間。

【50+】

留位放黑膠

54歲雷有輝:屋企擺咗超過15年嘅電腦顯示器,一來制式太舊唔啱插,屋企多返黑膠,要騰空位置收藏,如果有朋友想要可以同我接洽。

【60+】

藏書過千件

62歲鄧達智:我啲藏書尤其fashion方面好多,仲有雜誌,我諗過萬本,另外仲有我嘅舊sample,呢啲對我係有歷史價值,好難斷捨離,但年結都要送出去,其實都送咗一啲畀唔同博物館,但都仲有好多,多嘅意思係要成個倉先放得落,超過一千件,呢啲都係自己心血,好難斷捨離。

失敗買袋狂

61歲吳岱融:香港屋宇咁窄,樣樣幾份會搞到成屋都係,我覺得為避免斷捨離嘅痛心,就係要keep習慣,盡量用嘅嘢唔好多過兩份,實用嘢一份就夠,我失敗,買好多個袋,大家要諗清楚,買返去會唔會用。

【2015年出道】

Nowhere Boys長情的告白

主音Van:我要斷捨離係呢個籃球,大學時朋友送畀我,十年前攞住呢個波準備去打籃球,但經過餐廳時喺門口仆低撕裂咗韌帶,以後都打唔成波,影響出騷都要忍住痛,見到個波都有腳痛感覺。我仲有好多夢想實踐,呢個籃球夢係時候move on。

結他手Ken: 我要斷捨離呢套菲林,細個覺得識影相好叻,每日攞儍瓜機周圍影,覺得黑白相好有格調,呢筒菲林係用完咗冇曬出嚟,應該有20年,一直唔捨得丟,朋友話咁耐曬唔到,所以決定斷捨離。

結他手Hansun:我有150度近視,配咗七、八副眼鏡,但我好少戴,覺得有少少浪費,只係貪靚又唔用,決定同佢斷捨離。

娛聞樂陪你走遍全球追星,即Like「娛果」FB 專頁!
BannerBanner