舞台劇《通菜街喪屍戰》光速售罄 梁祖堯睇中Ben努力:正常行路都係練返嚟

更新時間 (HKT): 2021.01.08 22:06
風車草劇團舞台劇《通菜街喪屍戰》開售,門票極速售罄。

風車草劇團的新劇《通菜街喪屍戰》將於3月在葵青劇院舉行15場演出,今次新劇除了梁祖堯,他更出面邀請《全民造星III》冠軍趙祥誠(Ben)加入,令入場券更搶手,結果新劇今早開售,已在一小時內極速清空,只剩下輪椅位,反應相當好。

《蘋果》今日聯絡阿祖,他稱要為ViuTV錄《空肚講宵夜》,未知道賣飛情況,但就收到好多朋友查詢可否訂飛。記者恭喜舞台劇在一小時內已賣晒飛,但阿祖反而嘆氣:「我覺得呢單嘢表面風光咋!因為我哋可以賣嘅飛只係得總票房嘅一半,限聚令下只係畀我哋用入座率50%去賣,唔畀我哋賣晒飛,依家只係賣到一半飛。」

擔心農曆新年假期後疫情爆發

阿祖仍然欣慰有人支持舞台劇:「絕對算係好消息嘅,知道大家咁渴望劇場,作為創作人、表演者係好開心嘅。大家都差唔多成年冇入劇場,原來大家都冇忘記劇場呢個媒體,都仲係咁餓劇場,係好鼓舞。」但現時最大憂慮是農曆新年:「假期可能會有一班人過完年由中國返落嚟香港,到時唔知會唔會有第六、七、八波咁爆起嚟。但冇辦法啦,工作都唔可以停止,劇本創作、排練,我哋都繼續進行,見步行步啦。」

風車草劇團上月原本要演出舞台劇《新聞小花的告白2白屋之夏》,不過因限聚令突然殺到,只能在限聚令前突擊舉行特別場,獲好多人支持。早前民政事務局局長徐英偉建議使用科技直播或錄播表演,阿祖曾在訪問中曾反駁:「首先呢件事係低能㗎!局長佢知唔知道,劇場裏面其實係冇WiFi呢?連手機訊號都收唔到,斷吓斷吓點做online呀?」阿祖今日受訪時,似乎終於心軟,希望今次可以順利演出,一旦再有意外,將會認真考慮以第二種方式將演出呈現給觀眾。

梁祖堯:要阿Ben正常人咁行路係做唔到

《通菜街喪屍戰》加入Ben,令新劇更有叫座力,阿祖昨日亦有提到,自己在比賽三十強前已邀請Ben演出。今日阿祖講起Ben,就透露Ben的角色是在後期才加入劇本,亦不會埋沒Ben的折骨天份,但他強調不是因為Ben識折骨才邀請演出,而是在A組的排練過程中見到Ben的努力:「佢係努力到你唔知原來佢努力咗咁多!」

阿祖以A4組40強的表演「想念」舉例,他指觀眾在電視上看數分鐘的演出,但背後Ben付出極大努力,甚至大爆阿Ben行路都有困難:「你唔知道,其實我只係要阿Ben好似正常人咁行路,但佢啲骨扭到咁樣,要佢好似好正常咁,佢係做唔到。佢總係好似『鄧下鄧下』,或者好有態度咁行,但要佢好慢、好感性咁行,佢係做唔到,但阿Ben好努力咁練,練到好似可以正常人咁行路。你真係唔知佢付出咗幾大努力、用咗幾多個夜晚,練到兩、三點,點樣返去個種(普通人)身體狀態。呢啲嘢觀眾唔會睇到,就係咁樣令我好欣賞呢個表演者嘅原因,就係咁樣令到我搵佢,我話有舞台劇一定會搵佢做。」

諗定同二汶合作舞台劇

阿祖被網民讚有眼光,他笑稱是好人有好報,令新劇演員名單中多了位《全民造星III》冠軍。「媽媽」帶阿仔上劇場,咁「爸爸」二汶呢?阿祖亦透露心中已有計劃:「二汶角色唔係咁啱今次,但我腦入面已經有另一個計劃同二汶做舞台劇,留返下次先,今次音樂性發揮唔到佢最好嘅嘢,留返下次音樂性強啲先碌佢張卡啦。」

訪問最後,阿祖對劇場依然未有開放日期仍耿耿於懷,不忿政府做足安全措施可以開記者會,但就不讓劇場在有足夠防護措施下,讓劇場重開。他說不希望以網上形式演出:「因為劇場就係劇場,同電視、電影真係唔同。但係我哋都會努力搵一個方法,好老實講,對於一個劇團嚟講,一次演出冇咗,要有下一次唔係咁容易,唔係話『改期囉』咁簡單。因為冇咗一個期嘅演出,就冇咗幾個月收入,其實劇團營運就係要靠票房收入,冇咗一個期係好恐怖。如果再係咁落去,劇場界就好難生存。」

-----------------------------

《蘋果》英文版免費試睇:了解更多

英文版已登錄《蘋果》App,立即下載/ 更新iOS / Android

-----------------------------

支持蘋果深度報道,深入社區,踢爆權貴,即Like蘋果專題及調查組FB專頁

娛聞樂陪你走遍全球追星,即Like「娛果」FB 專頁!
BannerBanner