黑氣石Edan想《膠戰》做長啲 魯庭暉點名要第二季計劃書

更新時間 (HKT): 2021.01.09 19:48
遊戲節目《膠戰》低成本又無聊,卻笑料百出。

ViuTV以往被人詬病,一個節目結束,下個節目交失棒,未能食住威勢留住觀眾。去年《全民造星III》成為話題作,總決賽最高收視更有7.5點(約49萬觀眾),實在不是小數目。之後接棒的《點擺》與《膠戰》曾經令人擔心會失手,不過《膠戰》相當生性,吸引觀眾繼續坐定定睇電視。

受惠於《全民造星III》,《全民造星》第一季最近再次登上ViuTV「最多人睇」欄目第一位,但《膠戰》越膠越勇,昨晚15集播完,成功搶上「最多人睇」頭位,主持之一兼MIRROR成員的Edan(呂爵安)帶領隊友打低姜濤。

遊戲節目多人睇亦有好口碑,連ViuTV董事總經理魯庭暉都忍唔住講兩句,他今日在IG形容無聊遊戲節目隨時比起其他節目難做,又口是心非,不肯承認會讚節目製作組,但就提出製作組的3點功勞,包括約6位節目主持有良好化學作用、後製細節位救到場、有勇氣為了拍攝節目,「禁錮」自己3個小時。魯庭暉亦笑製作組自作聰明,在昨晚最後一集結尾擅自預告有第二季,他解釋:「我剩係叫你哋諗第二季點做咋。」但又補飛:「 唔該星期一畀個production plan 嚟。」似乎第二季都走唔甩。

《膠戰》老鼠屎擔當、主力出賣隊友的Edan,今日以短訊回覆《蘋果》,好開心第二季有機會成真:「因為估唔到真係會開,一直都係諗住講吓、搏吓會開,點知真係成真,我哋6個都好開心!我哋都好期待,今季因為半個鐘嘅關係,其實真係cut咗超多嘢,好多我哋之間嘅相處,甚至基本上每個主題都有遊戲係拍完冇出,所以希望新一季會長啲。」

至於有不少網民指節目無聊,Edan表示:「其實我哋玩啲嘢都真係幾無聊㗎,所以覺得無聊都正常,哈哈!不過可能大家都感受到我哋6個之間嘅嗰種默契同埋火花,所以無無聊聊咁又幾好笑!有咗第一季嘅經驗,我相信主持同製作組都會汲取到經驗,會越做越好。」

-----------------------------

《蘋果》英文版免費試睇:了解更多

英文版已登錄《蘋果》App,立即下載/ 更新iOS / Android

-----------------------------

支持蘋果深度報道,深入社區,踢爆權貴,即Like蘋果專題及調查組FB專頁

娛聞樂陪你走遍全球追星,即Like「娛果」FB 專頁!
BannerBanner