83歲梁愛揭李香琴是救命恩人 數十年前曾借15萬應急

更新時間 (HKT): 2021.01.10 19:11
梁愛談離世的李香琴。

資深演員李香琴上周一離世,享年88歲。琴姐女兒蕭紫筠日前在報章發訃聞,透露琴姐喪禮將於本月25日在紅磡世界殯儀館舉行,喪禮將以追思會形式進行,翌日大殮,並隨即出殯奉柩哥連臣角火葬場火化。

琴姐縱橫影視圈大半個世紀,2003年在番禺為亞視新劇試造型遇上黑幫點錯相,當時琴姐與資深演員梁愛(愛姐)等人乘車返回下榻酒店,在門外突然遇上大班人手執鐵枝與磚頭打爛酒店門外所有車輛,嚇到琴姐伏在車廂地上,愛姐擔心玻璃碎片弄傷琴姐,伏在琴姐身上作掩護。

日前《蘋果》跟83歲愛姐講起當年掩護琴姐,愛姐說:「嗰次係返大陸拍楊紹鴻套劇《愛在有情天》,點知被人點錯相扑玻璃窗,佢(琴姐)驚吖嘛,我咪伏喺佢身上掩護佢,我都唔知點解咁勇。」愛姐表示,她跟琴姐是非常要好的老友,但二人並非粵語片年代熟絡,而是拍電視劇,愛姐說:「我哋以前成日孖公仔咁拍電視劇,合作過好多好多,好似《狂潮》咁,我做佢工人,佢係我救命恩人,當年我個仔唔夠錢去英國讀書,佢二話不說借咗15萬畀我,當年我個仔出世,佢仲話不如契畀佢,我話契乜嘢吖,我個仔契觀音。」可惜愛姐獨生子2018年猝死,白頭人送黑頭人。

對於琴姐離世,愛姐慨嘆說:「其實對佢嚟講係一個解脫,好彩佢走得好安樂。其實我一早叫佢唔好拍嘢(琴姐2010年拍無綫劇《公主嫁到》時因連踩4日,每日踩足10小時,結果某日開工突然暈倒),我話:『拍乜鬼吖,你又唔係等錢使,你啲錢食幾世都未食完啦!』不過佢唔聽,佢話鍾意熱鬧,鍾意有人陪佢!」

-----------------------------

《蘋果》英文版免費試睇:了解更多

英文版已登錄《蘋果》App,立即下載/ 更新iOS / Android

-----------------------------

支持蘋果深度報道,深入社區,踢爆權貴,即Like蘋果專題及調查組FB專頁

娛聞樂陪你走遍全球追星,即Like「娛果」FB 專頁!
BannerBanner