【娛樂人物】神經刀的初心 CY

更新時間 (HKT): 2021.01.10 02:00

彭秀慧在《造星III》的一句「爛泥扶唔上壁」改變了CY(陳澤言)的命運。決賽後的一個星期,這個訪問在元旦進行,一句「新年快樂」由24歲的年輕人說出,份外真摯。

這大半年,CY經歷了很多第一次,第一次參賽,第一次令人認識,第一次有自己的粉絲……他在影樓看着自己拍照後的相片,很興奮的望着電腦螢幕,記者對他說:「同你面試個樣真係差好遠!」他回一個痛苦狀:「你唔好再提啦!」

CY有個外號叫「神經刀」,常有出奇不意表現的意思。有誰會想到,最初一臉懵懂的他,在台上可以發光?「佢哋覺得我觸摸唔到,但係覺得搞笑,我覺得神經刀都幾貼切我!」

不只導師網民愛他,連許廷鏗、欣宜和謝安琪等都大讚他,CY在台上就是有種魅力。他說自己仍是個待出道的人,歌星之路很漫長,「我嘅初心就係我鍾意唱歌呢一團火係唔會熄!」

突如其來多人認識,CY說生活上其實沒有大轉變,「都係要食飯、搭車,其實冇乜嘢分別!」比較困擾,可能是一頭金髮太易認,下次搭車,都係小心啲好。

撰文:文嘉龍

鬧你想你變得更加好

CY不是振英,這個CY叫澤言,英文名Chase,追夢個追。他有很多第一次發生了,賽後第一次接受專訪,第一次到《蘋果》……決賽後的心情依然未平復,「第一次喺大舞台表演,完咗有好唔真實同好掛住嘅感覺。第一次企喺台,對住前輩評判,我又好凍,完全冇經驗,但係我竟然好期望可以快啲去做,心情轉變得好快!」

當晚唱完《如果我是陳奕迅》,台下評判兼ViuTV高層金廣誠說出評語:「我覺得你把聲有少少似Eason初期,我好想你有自己style。」CY答他:「呢個我把聲嚟㗎喎,我平時講嘢把聲都係咁。」這番對答,被指惹得高層黑面。

CY說,認識他的人就知道他不是有意,他從來都是有話直說,「完咗之後我覺得有一種釋放,但又有少少失望,腦裏面諗咗好多嘢。我係咁跳,啖氣未上嚟,個人真係懵,唔知發生緊乜事,跟住冇啦啦問我呢個問題,講真,我完全冇諗過就直接答佢『我把聲真係咁』,後尾我都同我啲朋友仔講,死啦,好似答得唔係咁好!」CY定一定神再補充,「呢個就係我囉,我個人就係比較跳脫啲!」

還有金廣誠叫他模仿被導師彭秀慧鬧他「爛泥扶唔上壁」的一幕,CY說,初賽時彭導鬧他的「恨鐵不成鋼,爛泥扶唔上壁」這兩句說話,是激發他越戰越勇的轉捩點,不是這兩句說話,可能看不到之後他發光的《王妃》演出。「因為我好鍾意佢(彭秀慧),我唔想見到佢失望,其實pre round我知道自己表現得唔好,我預咗會離開,冇諗過會去到決賽。我覺得佢講呢兩句說話並唔係因為佢鍾意我,我覺得一個人鬧你,就係想你變得更加好,所以我好感激佢!」

由早期的遊魂到之後打了強心針般的自信,這兩句說話對CY來說太重要,「其實佢講完呢兩句說話之後,我有一下係sad咗,我唔知點樣去面對,我個頭耷低咗諗好多嘢,呢個比賽始終都要繼續,唔為自己都好,為人哋都好啦,我覺得盡力囉!」

我係待出道歌手

彭秀慧其實不只這兩句說話對CY影響深遠,她早期已形容CY是一把神經刀,自此成就了CY的代號,在Ig更立即擁有一班稱為「神經刀追隨者」的粉絲團。CY覺得用神經刀來形容自己非常貼切,「有陣時做嘢好好笑,但係又會吸引到人哋去望,有陣時又會drop咗好多,你捉摸唔到呀,我覺得我個人就係咁,因為我隨心,好多嘢都會畀心情影響,呢樣都係我需要改善嘅一關,但係我覺得呢個特質唔可以冇,因為係天生,只要將缺點去變得更加好。」

回想由報名參賽至今近半年,CY填報名表那刻已經神經刀。今屆《造星》主題是「藝人再出道」,CY與今屆的參賽者Will(李浩軒)是中學同學,Will拿了報名表給CY的經理人,說是經理人,其實即是CY的姑姐。「好搞笑,因為今季好似話要有公司定係經理人,我又唔知點填喎,但係我又有一個經理人,我咪寫兩年囉(入行),但其實我係『待出道』。」

填報名表格時,CY連《全民造星》頭兩輯也沒有看過,甚至MIRROR是誰也不知道,誤打誤撞鋪了一條「造星之路」。CY說:「本身我好鍾意唱歌,但係我未有一個渠道,唔好話想做歌星,我想做一個歌手,但我未係囉!始終我所有嘢都係零,我冇可能喺一個《全民造星》裏面就搵到自己定位,我覺得我有好多嘢都仲摸索緊,我𠵱家覺得除咗音樂係自己想做之外,我都想嘗試其他方面,搵吓自己係咪真係鍾意嗰樣嘢!」

CY參加《全民造星》之前,他是在銅鑼灣的一家酒吧做bartender,再之前的一份正職則在酒店做bellboy,CY知道這兩份職業都不是想要的工作,不過為了生活,也要現實地解決「食飯」問題。有一晚,CY和朋友在酒吧唱卡拉OK,同場遇上側田,他膽粗粗在偶像面前唱起歌來,「老細對我好好,之前有啲freelance都會搵我接,嗰晚唱完傾緊偈嘅時候,冇啦啦側田嚟咗,我啲friend知道我鍾意側田,佢哋話快啲唱首側田嘅歌啦,跟住我就唱咗隻《美麗之最》。側田聽咗就行過嚟同我傾咗幾句,佢話我把聲幾特別,叫我加油,繼續畀心機,我覺得呢番說話對我幾大鼓勵。」

不只得到側田鼓勵,《造星III》亦令到本身與家人溝通不多的CY,彼此多了關心。成長於單親家庭、身為獨子的CY,自小與父親很少溝通,「其實本身我同屋企人溝通模式唔係話太好,因為我哋好少會傾偈!」說到家人,CY有一陣猶豫,「我單親,我跟爹哋。我知佢係關心我,但係佢都係一個唔善於表達嘅人,同我一樣唔係好識點樣講出口,但係佢喺電視見到我嘅時候,我feel到佢有一種好戥我開心嘅感覺。自從我參加咗《全民造星》,佢先多咗嘢同我講,開始會關心我,問吓我最近有冇乜嘢壓力呀!」

30歲之後仲有得搏

CY的父母在他小時候已經離婚,他坦言有時候會掛念媽媽,「佢有時都會返嚟搵我,因為佢𠵱家喺新西蘭,佢過時過節都會返嚟香港會搵我食餐飯。我想去嘗試了解佢哋(父母),始終有啲問題一定要解決,但係我又唔會太過干涉我爹哋媽咪嘅嘢,我會嘗試理解囉!」決賽當日,爸爸簡單的一句說話已經很窩心,「佢同我講,今日加油,乜都唔好諗,做自己,唔使諗!」

說到最重要的人,CY在決賽台上說要感謝三位生命中重要的女人,一個是花姐,一個是彭秀慧,最後一個他沒有說出口的,事後很多人估計那個人就是同組的卡文(關嘉敏)。因為決賽後,CY和卡文被拍得拍拖搭港鐵,卡文更在車廂冧爆挨落CY懷中。CY說第三個重要女人是:「最尾嗰個係我經理人,即係我姑姐。」至於和卡文關係,「我同佢真係冇一齊過!我見返張相,我都想講,首先地鐵真係搖,可能就係嗰吓咁啱係佢撞埋嚟!除咗卡文,我都會同Kelly(王嘉莉)出街,都會同第二啲人出街,但係點解會係卡文呢?」

神經刀這時候就很官腔,他說:「我一直覺得有一句說話好啱聽,謠言止於智者,有時有啲嘢未必係真嘅!」CY說自己現正單身,拍過四五次拖的他,曾經被hurt得很深,「我𠵱家冇女朋友,唔記得單身咗幾耐,都有一段時間!感覺呢樣嘢好難講,有咗感覺先至慢慢去相處同溝通。最hurt我就唔想講,我直頭唔想提,傷心到真係喺屋企成日都唔想出街,好想匿埋自己。」

CY說私底下的自己,本來就是一個不愛說話,常常宅在家的一個人,不過,當有機會上台表演和唱歌,他的另一面就可以發揚光大,這個反差才有他神經刀的一面。「細個我想做醫生,因為覺得醫生好偉大。我記得到咗中學接觸音樂,我第一次聽嘅歌係Beyond《海闊天空》,跟住我就好鍾意唱歌。」

參賽期間甚至到現在,其實CY都並未辭去酒吧工作,「不過𠵱家都冇開(酒吧令)!老闆對我好好,佢話,你放心去啦,你個位會留喺度,我等你返嚟!老闆真係好好。」新的一年,說到未來,CY說ViuTV仍未找他傾合約,「暫時未有呢個通知!如果有梗係見面先啦,我覺得乜都要傾、乜都要見,你未知佢會對你點㗎嘛,見咗面先啦!𠵱家唱吓cover,YouTube channel都要做,因為我真係唔想辜負鍾意聽我唱歌班fans,所以就算我冇唱片公司都好,我都會keep住!我覺得男仔30歲之後都仲有得搏,但係我會對自己harsh啲,即係30歲之前,仲有六年時間。」

神經刀最後發揮本色,「暫時都冇乜工作安排,冇乜人搵我呀,好慘呀,快啲嚟搵我吖!」

【後記】Eason

不少人都覺得CY唱歌聲線似Eason,他說:「我鍾意自己呢把聲囉!我唔識點樣去分辨我把聲係點樣,我多數都係聽人講,話我把聲都幾厚喎,同埋覺得我講嘢好舒服,我自己都覺得把聲好聽嘅!」

廣東歌偶像一定非Eason莫屬,「Eason嘅廣東歌影響我最多!搞到我好似好老咁,又唔係話聽佢嘅歌大嘅,但係佢啲歌真係耳熟能詳,好聽!」

死未,聽Eason歌長大的,已經怕令人覺得自己好老了!

娛聞樂陪你走遍全球追星,即Like「娛果」FB 專頁!
BannerBanner