鍾舒漫自揭患失聲怪病爆喊 鍾舒祺讚家姐男友Steve不斷向好

更新時間 (HKT): 2021.01.15 14:48

鍾舒漫(Sherman)與前落選港姐陳潔玲去年因為合作搞抗疫產品生意而爆金錢糾紛,對方隔空開火,之後更對薄公堂,案件今年3月13日再審。Sherman擔任MV副導演的男友Steve Lam(林灝軒)曾為女友出頭,在社交網公審陳潔玲食人血饅頭兼騙財,不過又爆出Sherman妹妹鍾舒祺不喜歡Steve,在她與友人流出聲帶中, 鍾舒祺爆粗喪插Steve為人差勁,希望家姐早日跟對方分手

Sherman與鍾舒祺兩姊妹昨晚為陳志雲網上節目《Stephen.傾》擔任嘉賓,志雲即追問鍾舒祺對家姐現任男友有何睇法,鍾舒祺就表示:「都越嚟越好。」她坦言最初鬧爆Steve:「鬧到死,你要認識一個人, 一開始的確有我自己意見,我希望佢(家姐)畀人照顧到,咁你要認識一個人,真係要花啲心思同時間,我肯去認識佢,大家隔咗咁耐一段時間,真係慢慢認識到呢個人,我見到佢進步呀,不斷向好,今日你同噚日唔同,聽日你又做出一啲好意外,我覺得你唔會做到嘅嘢,每一日都有surprise,我係安慰嘅。」

當志雲問到兩姊妹最低潮時,Sherman已經忍不住眼紅紅想喊,她說:「最struggle係呢幾年,我有幾年唱唔到歌,我每一次出嚟之前都要花好大力氣,而家處理緊,我之前冇分享過,每一次我都扮冇嘢,但其實我有嘢...」此時鍾舒祺代家姐解釋:「佢今日嚟之前,一隻唱咗10幾年嘅歌,佢每一日用咗10個鐘嘅時間去唱嗰隻歌。」Sherman邊喊邊解釋:「可能你覺得好誇張,個奇怪位係我check咗唔係喉嚨有事,我情況有小小複雜,可能我今日做咗一件事,我聽日冇晒啲記憶,唔識做返,我想講如果一個人有專長嘅嘢,你鍾意就要去做囉,唔好到老來後悔...點解我咁痛苦,因為唱歌係我第一,我好細個已經好鍾意音樂,我喺音樂上先搵到自己,所以我覺得好似冇咗條命咁。」

志雲問她失聲原因,Sherman說:「其實係一個累積問題,過往我對自己要求又好高,push自己好犀利,我有段時間其實唔鍾意自己把聲,好憎自己把聲,我決心要扭轉變成第二樣嘢。」志雲問她如何扭轉,Sherman就指2019年接演音樂劇《唯獨祢是王》時,自己已控制不到自己聲音,曾經唱不出,面對住觀眾要力挽狂瀾的感覺好傷心,突然間給她一個反思:「套劇叫《唯獨祢是王》,我發覺原來我當咗自己聲音係王,我覺得冇咗我聲音,我係廢物,我好似係拜緊我自己聲音,套劇話畀我聽,聲音唔係我嘅王,我擺低咗呢樣嘢。」

-----------------------------

《蘋果》英文版免費試睇:了解更多

英文版已登錄《蘋果》App,立即下載/ 更新iOS / Android

-----------------------------

支持蘋果深度報道,深入社區,踢爆權貴,即Like蘋果專題及調查組FB專頁

娛聞樂陪你走遍全球追星,即Like「娛果」FB 專頁!
BannerBanner