囝囝女女730丨CY搭強尼擔正首集節目 同金廣誠碰拳和解

更新時間 (HKT): 2021.01.17 19:48
CY與強尼為首集《囝囝女女730》做主持。

ViuTV《全民造星III》再次成功造星,今次極速添食拍綜藝節目《囝囝女女730》,由強尼、沈殷怡、《造星》大師兄MIRROR到新出爐的師弟妹《造星III》都有,相當大堆頭。節目明晚首播,安排逢周一至周五晚上7時半做半小時節目,與無綫同時段的《東張西望》爭收視。

《囝囝女女730》今日在九龍灣展貿錄影廠開記招宣傳,出動23人陣容相當大陣仗,包括節目主持強尼、沈殷怡、岑日珈、MIRROR成員Lokman、Tiger、Alton、Frankie、《膠戰》主持黃正宜,而15位《造星III》仔仔女女包括冠軍Ben、亞軍陳葦璇、季軍ANSONBEAN、Cloud、Mischa、KLAU、Alina、CY、Kimman、NY、Manson、Kiki、張右雨、Waiwai、鄺旨呈以客席主持身份參加,但活動未開始,已吸引半百《造星III》fans在九展門外聚集追星。

今次節目每日有不同主持、不同話題,周一就有強尼與CY,強尼說觀眾以往在相同時段多數睇資訊節目,今次變陣有好多偶像,或者可以令觀眾再次「睇住電視食飯」,而CY將會有度身訂造環節《我把聲係咁》,與鄭欣宜、許廷鏗合唱。之前CY在總決賽舞台當面駁高層金廣誠嘴,今日金生仍然捧場,與CY一面見就碰拳合照,合照完畢又互拍心口、膊頭,非常好朋友。

強尼與CY一起受訪,不過被叫做神經刀的CY就相當寡言,幾乎所有問題由強尼全包。強尼透露上半年要為真人騷《造美人》開工:「都要4個月,同《造星》差唔多時間,講啲女仔會變樣,有啲變化,我諗去到9月都唔會有劇見到我。」

CY一向冇路捉,在決賽大叫「NY出嚟喇」,令強尼招架不住,今日強尼就說:「就係有神經刀先好睇。」又不擔心得罪嘉賓欣宜與許廷鏗:「就係想要佢呢啲嘛,啲嘉賓知佢係咁。」講起決賽駁金生嘴,CY表示事後沒有找過金生,原因是:「冇佢電話!」然後又扮電話傳銷聲線:「你好,我係PCCW!」在訪問以外時有極活潑一面。

-----------------------------

《蘋果》英文版免費試睇:了解更多

英文版已登錄《蘋果》App,立即下載/ 更新iOS / Android

-----------------------------

支持蘋果深度報道,深入社區,踢爆權貴,即Like蘋果專題及調查組FB專頁

娛聞樂陪你走遍全球追星,即Like「娛果」FB 專頁!
BannerBanner