前無綫幕後借錢走數苦主導演報警兼爆料 林夏薇林盛斌同為受害者損失數萬

更新時間 (HKT): 2021.01.17 18:42

疫下經濟低迷,娛樂圈台前幕後都大受影響,好多人都沒工開。大台導演Eddie近日在社交網爆料力斥TVBI前經理Simon自2009年開始,過去12年間先後以財困做藉口,向他借了共13萬未還,苦主Eddie上周五到警署報案,他呼籲其他受害人都出來報警。有指Simon曾向林夏薇、陳敏之、莊思明、唐詩詠、楊思琦等借錢,最終林夏薇借對方5,000元救急,《蘋果》今日收到風Simon曾先後以財困為由向林盛斌(Bob)借過三次錢,總數共數萬元,有指受騙苦主最少20人。

大台導演Eddie踢爆TVBI前經理Simon向台前幕後借錢走數,有指Simon於無綫任職多年,主要處理海外事務,包括藝人外地宣傳及登台,由於在公司接觸過不少藝人,所以就向他們埋手開口借錢,他多以家人和愛犬有病或周轉不靈做藉口,並恃着藝人不會追數屢屢得逞,Simon前年已離職。

Bob今日回覆傳媒證實同為苦主,他說:「當時同佢唔算十分熟,但係喺TVB入面見到都會傾吓偈。佢冇做之後,都間中有聯絡,咁佢又話過因為生活有困難,屋企人又出咗事,當時覺得自己如果可以幫到手嘅,就幫少少手啦。上年一月借過兩次,三月再借過一次,總數幾萬蚊,實際數字唔講喇。」Bob心中有數追數無門:「唉,冇㗎喇!」

林夏薇亦向傳媒表示去年10月曾接到Simon短訊先借3,000元,其後再說自己及愛犬都有事,他再開口借2,000元,林夏薇雖不相熟,但抱着江湖救急心態而過數幫忙,想不到對方竟是慣犯。有指受害者導演Eddie在2009年入職TVBI,其時因為見Simon情況而心軟,更為他到財務公司借錢,孭下周身債,這12年間對方一直採拖字訣不肯還錢。導演Eddie昨日在社交網出post公開事件,呼籲大家提防不要中招,他今日回覆傳媒時說:「應該係話,有俾佢呃過嘅人都慘,唔單單係我一個。」Simon昨日在MeWe貼文指自己WhatsApp被hack。莊思明也收到過Simon要借錢的訊息,不過她當時以因投資未有流動資金為由拒絕。至於陳敏之和唐詩詠則因為聽聞對方不停向公司人借錢前科而未有上當。

欠款近20萬

Simon今日接受《蘋果》電話訪問時否認走數,他又表示早前更換新電話時失去部份舊同事聯絡,他指跟「債主」藝人有協議環境許可會逐步還款:「2017年底離開無綫,呢兩年又社會運動又疫情,我都係做散工,而家又失業。當年公司架構重組我辭職,我問藝人借錢,而家有WhatsApp同錄音記錄,我都有問過佢哋方便先借,Bob同薇薇都知道,我絕對唔係偷呃拐騙,我唔係騙徒,我想主動解釋番係唔想事件再發酵。我電話冇改,呢件事我要向受影響人致歉。」

問到Simon共向台前幕後約多少人借錢?他說:「幾多人就唔講喇!」涉款約多少?Simon續說:「唔多過20萬,呢個數我講多咗。」Simon聲稱有能力一定逐個還錢,至於有沒有還款期,他說:「講唔到,總之分期,我有多少會還多少。」對於Eddie稱欠款達十多萬,Simon指若有文件、證據可以拿出來:「呢件事當中或有誤會,我以前有間製作公司,唔排除佢計埋當中工作嘅錢,都咁多年好多嘢唔記得。」

-----------------------------

《蘋果》英文版免費試睇:了解更多

英文版已登錄《蘋果》App,立即下載/ 更新iOS / Android

-----------------------------

支持蘋果深度報道,深入社區,踢爆權貴,即Like蘋果專題及調查組FB專頁

娛聞樂陪你走遍全球追星,即Like「娛果」FB 專頁!
BannerBanner