周柏豪遭fans離棄感傷心 網民譏:你割香港人席在先

更新時間 (HKT): 2021.01.18 13:50

TVB小圈子音樂頒獎禮「2020年度勁歌金曲頒獎典禮」昨晚揭曉賽果,雖然變星夢春茗全部「自己人」玩晒,但獎項都竟然唔夠分,「藍神」周柏豪奪最受歡迎男歌星要斬半給胡鴻鈞(Hubert),認真失威,被fans割席的他,據聞離去時電視城門外零fans等候,自作自受。

雖然男歌星獎都要分豬肉,但柏豪接受訪問時就笑晒說:「好驚喜,覺得好特別,聽講從來冇咁嘅情況出現,亦好替Hubert開心,雖然我唔係大佢好多,但睇住佢一步一步努力,今日可以同佢企喺台攞獎係開心事,大家都喺呢行做咗咁多年,都會明白得到獎項係一件開心事,唔會覺得分薄。」柏豪不停話同胡鴻鈞私下是好朋友,打過無數次籃球,屋企人亦好喜歡對方,「尤其屋企細路仔都係佢fans,今晚返去小朋友應該覺得我做到嘢,終於覺得我叻,同你拎到同一個獎。」

至於早前發表「阿仔要孝順阿媽」言論比喻香港和大陸關係,高調表忠令網民反感和fans割席,柏豪繼續以屋企人做擋箭牌:「有好多朋友關心我,冇咩可以回應,我繼續照顧好屋企人就ok。」對於被fans割席離棄,柏豪說:「當然一路支持自己嘅人,因為我突然一啲言論去到所謂割席,甚至整爛晒啲CD,當然係一件傷心事,我會有啲唔開心,我都係人嚟,但我唔能夠停留呢個情緒太耐,因為我屋企人、幕後啦,我嘅情緒其實好影響佢哋,所以我有責任要活好自己,做好作品,令支持我嘅人唔好失望就足夠。」

柏豪的「我都係人嚟」論又引爆網民熱議,揶揄:「我都係人會貪錢」、「所以fans唔係人,可以畀佢背叛?」、「自己講啲咁嘅言論,割香港人席在先,怪乜嘢fans割你席喎!」、「邊有人信?連良知都冇,又點會care fans點諗,頂多care fans啲錢咋?」據知,昨晚柏豪雖然冧莊半個最受歡迎男歌星,但卻沒有fans在電視城門外等他,創下零fans慶祝歷史紀錄。

至於獲最受歡迎女歌星的菊梓喬,正式撼低吳若希成為星夢一姐,「佢從來唔係競爭對手,佢係一位前輩,衷心祝佢湊BB快樂。」問到是否想吳若希以後專心湊B?她說:「唔係,有小朋友係好幸福嘅事。」而獲金曲金獎的莫文蔚就表示很想念在英國的老公,自己要留港籌備演唱會,希望老公能過來跟她重聚。

-----------------------------

《蘋果》英文版免費試睇:了解更多

英文版已登錄《蘋果》App,立即下載/ 更新iOS / Android

-----------------------------

支持蘋果深度報道,深入社區,踢爆權貴,即Like蘋果專題及調查組FB專頁

娛聞樂陪你走遍全球追星,即Like「娛果」FB 專頁!
BannerBanner