傅珮嘉再做老闆娘呻攰爆喊 老公懶理被指養「曱甴」

更新時間 (HKT): 2021.01.21 23:35

這兩年香港的變化起落,令大家感受很深,很多人說,香港回不了最美好的時代。70後的一代感受很深,到底見證香港變遷的這一代人,他們又會用甚麼思想去孕育自己下一代?今集《王探黃》,王宗堯訪問了一個港台家庭,女歌手傅珮嘉於2005年嫁了台灣老公Steven,並育有10歲兒子Jasper。

傅珮嘉在2019年立場鮮明,關心學生,她和台灣老公Steven去年突跟食店拍檔因理念差異「割席」,連同一班店員都失去飯碗。疫下拆夥,一靜不如一動,傅珮嘉去年7月舉家返台,她曾想過不再回來。可是良心老闆Steven為着對舊員工的一份責任,當他在港找到心水舖位,就決定在灣仔再開台式食肆「尚青商號」,重新招攬舊員工再一齊拼搏。於是全家又一條心重回起點,兩夫妻夾手夾腳開舖,傅珮嘉每天都會返店幫忙,熟手沖台式奶茶的傅珮嘉更自嘲是「水吧妹」。

台灣人的Steven在加拿大接受教育,習慣自由空氣,兩公婆也想讓兒子自由成長,傅珮嘉說:「我諗呢兩年,每個人嘅心情都好沉重,唔會覺得冇事發生咁樣。」去年一家決定回流,當然都考慮到兒子讀書及生活上面對的問題,傅珮嘉說:「我個仔基本上去邊度都得,佢只係有一個要求,佢認真同我哋講過,爹哋媽咪喺邊,佢就去邊。」Jasper諒解父母為新店會分身乏術,陪他的時間也要減少,Jasper安然接受,當補習老師把Jasper想陪伴支持父母的心底話轉告傅珮嘉時,她非常感動,「原來佢真係有諗,佢係有思想,10歲小朋友絕對可以話到畀你聽,佢可以好成熟,佢可以照顧到自己,不過我哋都要理吓佢!」

保護兒子的童真

傅珮嘉強調老公Steven着重對囝囝的身教:「老公由細到大都train緊佢。」Steven表示兒子可照顧自己:「我訓練他的就是獨立,不然的話,到全世界任何一個地方獨立不起來的話,根本沒有辦法走下一步。」傅珮嘉也教Jasper要有自己獨立思考,2019年香港發生的社運,絕對是一個好課題:「我會講晒兩邊,因為我覺得只講一邊係唔fair,我哋自己一定有一啲情緒,自己嘅觀感,唔應該加諸落小朋友身上,畀佢兩邊都睇,自己分析。」Steven尤其鼓勵兒子獨立思考,並舉出當年在加拿大生活,他自爆都曳過又飛車又打架:「如果唔識諗嘅話,好容易就埋堆,一旦埋堆,後面就玩完,我教個仔自己要分析好多嘢,唔係人哋同你講,你就信,要了解呢樣嘢後面咩原因。」傅珮嘉夫妻都希望保護兒子的童真,始終這一代年輕人的經歷或許令他們預計不到將來,「我哋經歷過好,佢哋冇經歷過,所以佢哋會有好多唔同嘅情緒,如果我可以保護到,我希望囝囝快樂長久啲,第日反正都係要面對嘅,有足夠嘅思維或者智慧去面對時先去面對。」

Steven對人對事的堅持,令老婆很佩服,她大讚老公是世界上最有正能量的人。Steven計劃多多,他有意等食店生意上軌道便交由店員打理,然後帶着妻兒到台灣宜蘭開民宿。聽到這裏,傅珮嘉就崩潰爆喊,向老公撒嬌:「我警告過佢,最後一次啦,我真係攰,我睇到佢咁樣我好攰,好想退休,我唔想再做老闆娘。」Steven邊安慰老婆邊說:「做老闆好辛苦, 好多人都話做老闆好型,其實最X就係做老細。」王宗堯認同做一個沒良心的老闆好易,相對做一個有良心嘅老闆係好難。Steven謂曾在網上看到一些留言指他「養曱甴」:「起碼我有能力去出糧畀啲員工去生活,員工都係用自己能力去賺錢,去到年尾嘅時候,都係要交稅畀政府。」傅珮嘉聽到破涕為笑,Steven再來一句真心話:「我其實好唔想畀。」

-

---------------------------

《蘋果》英文版免費試睇:了解更多

英文版已登錄《蘋果》App,立即下載/ 更新iOS / Android

-----------------------------

支持蘋果深度報道,深入社區,踢爆權貴,即Like蘋果專題及調查組FB專頁

娛聞樂陪你走遍全球追星,即Like「娛果」FB 專頁!
BannerBanner