MIRROR新專輯秒速賣斷市 炒價高見$2,800 信和老闆:瞬間售罄近年難得一見

更新時間 (HKT): 2021.01.22 19:15

成軍兩年的男子組合MIRROR在頒獎禮可謂大豐收,無論組合獎還是成員個人獎都有斬獲,其中姜濤在月初舉行的叱咤樂壇頒獎禮上贏到開巷,以21歲勇奪「叱咤樂壇我最喜愛的男歌手」及「叱咤樂壇我最喜愛的歌曲大獎」,打破最年輕紀錄,雖然有人覺得姜濤未夠班攞獎,但亦有人覺得香港樂壇終於有新血,總算帶來新希望。

去年11月,MIRROR推出兩周年團歌《One And All》後,首張專輯《One and All》亦同時開售,當時反應熱烈,其後再決定限量加印專輯,安排在本月20日開賣。專輯加印推出當日,已經有fans一早排隊搶購,結果迅速賣斷市,有店舖吼準時時機,本來新專輯的建議零售價是330元,將價格提高到1,000元,甚至在拍賣網更高見2,800元炒價。有fans在花姐的telegram群組內大吐苦水,希望花姐可以出手幫助。

秒殺專輯要貼「沒有MIRROR」告示

《蘋果》記者今日走訪旺角信和中心唱片舖視察,其中一間冇貨,另一間則以炒價900元出售,店員更透露只獲配4套專輯,剩下最後一套不愁冇人買。唱片舖Sky music亦早已賣斷巿,店主阿威表示瞬間售罄,速度驚人,fans瘋狂畫面近年難得一見,令他要在門外張貼告示寫上「沒有MIRROR」來應對連日數百fans查詢,老闆阿威說:「不出半個鐘售罄,我哋幾個平台加埋都超過500人詢問情況,所以索性貼張紙出嚟慳番啲口水。」

雖然不便透露獲配給數量,阿威形容:「好受歡迎,係秒殺,有人排隊,我哋都叫佢哋唔好排,因為數量唔夠供應。」阿威做良心老闆,沒有炒高專輯售價,唯一希望是解決貨源問題:「希望攞多啲貨,但係配給,由唱片公司安排。好耐冇見過咁受歡迎嘅歌手,fans都有向我哋反映,我只能安撫佢哋盡力去搵,基本上大家都知難搵。」更指若有更多貨源,銷量成績更加輝煌,絕對可以媲美追捧韓星的情況。在這個疫情市道,MIRROR專輯可以幫忙救巿,阿威說:「希望可以有多啲供應量,難得有一隊唔錯組合,可以救巿,需求好大,希望可以放多啲出街。」

《蘋果》今日亦有向經理人花姐與及MIRROR的成員了解,但暫時未有回覆。

-----------------------------

《蘋果》英文版免費試睇:了解更多

英文版已登錄《蘋果》App,立即下載/ 更新iOS / Android

-----------------------------

支持蘋果深度報道,深入社區,踢爆權貴,即Like蘋果專題及調查組FB專頁

娛聞樂陪你走遍全球追星,即Like「娛果」FB 專頁!
BannerBanner