沈卓盈新手媽媽疑問多 約陳自瑤取經傾足10粒鐘

更新時間 (HKT): 2021.01.23 18:07
IG圖片

沈卓盈近日宣佈陀牛B,除了開工外,她盡量爭取休息安胎,昨日在IG貼出相約閨密陳自瑤(YoYo)見面照片,沈卓盈自爆午餐傾到晚餐,由於晚上6時禁堂食,兩人最後返了沈卓盈家繼續吹水到凌晨,玩足一日,沈卓盈在IG貼上派心相片並留言:「好耐冇見我嘅女神Baby啦,今次由午餐食到下午茶直到餐廳打烊,然後返屋企再食埋晚餐都未夠,已經約埋下次見面,兩個傻傻的坐埋一齊真係笑餐飽,其實開心可以就係咁簡單,送給大家我們的心。」

沈卓盈還大爆兩女傾偈時,肚中寶寶有反應:「我們在笑寶寶在踢,這位小聽眾好興奮。」沈卓盈當然有向妻已有一女的YoYo取生B經,沈卓盈今日接受《蘋果》訪問時說:「我哋係咁傾唔停,新手媽媽問題多嘛,老公笑我哋爭兩個鐘就見足12個鐘。YoYo有畀貼士我呀,佢知我要開工,所以叮囑我要休息多啲,手頭上嘅節目拍到月尾就完。疫下又開工拍《五星級絲打ll》,我好多時間都留喺屋企避疫,加上懷孕初有妊娠反應唔舒服,放假唔出街安胎,呢排見舒服同精神啲,所以開始約番朋友見面。」

拍攝期間曾匿女廁嘔

問到沈卓盈懷孕情況,她續說:「而家胃口正常,但係要控制飲食,少食多餐,預產期係年中。記得頭嗰幾個月辛苦啲,妊娠反應,當時未夠3個月唔公佈得住,大家都唔知,試過拍攝中途唔舒服,偷偷哋匿喺廁所嘔,好彩拍攝節目都算輕鬆,仲應付到。」

此外,沈卓盈未離開TVB時拍攝劇集《平安谷》,與同劇的龔嘉欣、陳凱琳及譚凱琪組成「少婦聯盟」,四女不時聚會,沈卓盈約滿離開大台,少婦聯盟活動少見沈卓盈,沈卓盈於2019年到布吉秘婚,也未有通知少婦聯盟,有報道指她與龔嘉欣、陳凱琳及譚凱琪傳不和?沈卓盈否認,她解釋是由於疫情大家少沒有相約:「嚟緊會約Zoe(譚凱琪)同Grace(陳凱琳)佢哋取經。」

-----------------------------

《蘋果》英文版免費試睇:了解更多

英文版已登錄《蘋果》App,立即下載/ 更新iOS / Android

-----------------------------

支持蘋果深度報道,深入社區,踢爆權貴,即Like蘋果專題及調查組FB專頁

娛聞樂陪你走遍全球追星,即Like「娛果」FB 專頁!
BannerBanner