李香琴設靈丨汪明荃演琴姐女兒曾擔心效果 羅家英揭對方是工作狂

更新時間 (HKT): 2021.01.25 22:24

汪明荃(阿姐)今晚與丈夫羅家英一起到殯儀館,向本月4日逝世的資深女演員李香琴致祭,阿姐及余子明獲安排在晚上7時半開始的追思會中致悼詞。

爆琴姐Locker藏道具

據知,阿姐在悼詞中講到自己與琴姐相識接近半世紀,她對琴姐的「西宮」形象最深刻,而她們的真正合作,是阿姐於1971年加入TVB後,一起做《歡樂今宵》,阿姐指無論主持、跳舞、雜技、現場賣廣告都難不到琴姐,而無論要琴姐挑戰何種歌唱風格,琴姐都可以即學即唱,阿姐更大爆對方的儲物櫃中有很多古靈精怪的道具,加上多諗頭,可以隨時逗得身邊的人十分開心。

阿姐又提到,後來被公司安排去劇組,在其中一套劇《永恒的春天》中,阿姐與琴姐飾演一對母女,阿姐曾擔心對方的「西宮」形象太深刻,會影響演出效果,怎料一埋位,琴姐的眼神變得慈祥又和藹可親,而對方更憑此劇成功「轉型」,改邪歸正。

而阿姐又提到琴姐在粵劇界的成就,而且就算已經是個資深前輩,都不介意做配角,也願意提攜後輩,又可以減人工,讓更多後輩有演出機會,也會顧及到較下層的工作人員。

阿姐離開靈堂時補充指琴姐是個樂於助人的前輩:「我聽其他人講,我感覺到原來佢係好熱情、好幫人嘅,會照顧啲後輩同低下層嘅演員,做大戲嗰啲,佢都有幫下手,個個都知道佢係好願意幫人,(琴姐係)孤寒自己就闊佬大家囉!」

家英哥慶幸曾合唱

至於家英哥就指自己自小已認識琴姐:「我爸爸同佢係好朋友,一齊去馬來西亞、安南走埠,好好彩我同佢唱咗兩首粵曲,一首係《胡不歸之慰妻》,一首係《宋江怒殺閰婆惜》,好開心能夠喺舞台上同佢合作過,不過電影就冇喇。」

講到對琴姐的印象,家英哥不停讚好:「好人一個囉!真係好好人,佢好肯幫我哋粵劇嗰啲,佢好唔忘本,雖然佢係做電影、電視,但佢對粵劇係不忘嘅,好值得我哋敬佩。」

據琴姐女兒蕭紫筠今日透露,會將帛金捐給八和會館,阿姐表示:「係呀,佢(琴姐)成日都話感激華光師傅畀佢入行。」此外,家英哥指琴姐是個工作狂,不會放棄任何工作,阿姐補充指因為琴姐要自己擔起一頭家,供養父母及弟妹,所以當年拍粵語片時,會盡量去接戲賺錢。

-----------------------------

《蘋果》英文版免費試睇:了解更多

英文版已登錄《蘋果》App,立即下載/ 更新iOS / Android

-----------------------------

支持蘋果深度報道,深入社區,踢爆權貴,即Like蘋果專題及調查組FB專頁

娛聞樂陪你走遍全球追星,即Like「娛果」FB 專頁!
BannerBanner