張致恒有錢請工人兼買電器 Naomi鬧爆拖欠5位數追極唔還

更新時間 (HKT): 2021.01.27 12:42

現年36歲的張致恒(Steven)在2019年7月突然宣佈雙喜臨門,與粉絲雯雯已誕下囝囝「天寶」兼在IG晒出一家三口的合照,但其後又驚爆Steve原來一腳踏五船,除了雯雯和舞台劇演員女友梁皓恩(April)外,還有Moon、C小姐和S小姐也與他有情侶關係,結果Steven被封賤男,形象直插谷底兼工作量大減,更被爆欠債纍纍,關智斌和鄭希怡合借了10萬元給他。今日《壹週刊》爆料,原來Steven仍欠下周身街數,被馮鎵瀠(Naomi)在社交網揞名鬧爆欠債不還。

Steven和老婆雯雯兩年抱兩,正當以為Steven修心養性,努力工作賺錢養家的時候,雯雯日前在IG限時動態出post鬧爆老公,直言自己很久都未試過「嬲到咁」:「當你拎住好多嘢,仲要包括電器,其實都只係希望姐姐可以出嚟村口幫手拎,到落咗車等咗10分鐘都唔見姐姐,打畀老公問佢,老公同我講:『姐姐好忙,所以唔知點樣叫佢出嚟……』」最後,雯雯更寫道:「當我發覺自己係唔可以嘅時候,我都只係希望可以有人幫忙,但係點解,我得到嘅答案係咁樣。」

但雯雯這段留言未有得到Steven的回覆,反而觸動了與他相識多年的好友o靚模馮鎵瀠(Naomi)的神經,她在FB暗寸有藝人有錢聘請工人兼購買新電器,但卻堅決不肯還錢,這位主角就是Steven。其後Naomi在IG限時動態連出幾個post,直言自己很窮,欠她錢的人要還錢!《蘋果》今日向Naomi了解,她表示當日同情Steven情況而借錢,她事後發現對方仍然有錢請工人,十分氣憤,所以在FB揞名爆料。

Naomi稱Steven在2019年7月向她借錢:「我借咗5位數字畀佢,佢話當時投資咗錢落自己演唱會,周轉唔到,演唱會後就會還畀我,或者內地商演出糧後,大概一個月左右可以還錢,我諗住做完騷都有錢還喇,點知拖到而家仲未還,我真係好失望。」Naomi續說:「我好無奈,見到買新電器同請工人嘅新聞,原來人哋嘅生活過得好過我咁多,我就要節衣縮食,面對停業難關,我真係超級勁嬲!新聞出咗後,有好多人聯絡我,原來有好多人都中招,大部分係幕後,亦有啲係教會同佢合作過嘅人,人人都係2000蚊。欠債不還錢的新聞曝光後,一直潛水避債的Steven忽然「上水」主動聯絡Naomi承諾還錢。

據知,Steven有周街借錢前科,他婚前婚後都不停問身邊友人求助解財困。有幕後苦主向《蘋果》爆料:「見佢話結婚生仔,話要生性做人,咪諗住介紹食店工作畀佢,點知佢嫌辛苦,完全唔想做,反而問我借2000蚊。」Steven這招借2000元已慣性使用,不少友人怕尷尬都寧願借他。新城DJ林柏希今日回覆《蘋果》:「Steven有問過我借錢,最後冇借畀佢,我有諗介紹份工畀佢好啲。佢冇覆我,我都有同佢家姐傾過,佢家姐叫我諗清楚。」

林盛斌(Bob)繼上次借錢給TVBI前經理Simon不還後,原來Steven也問他借錢,Bob今日回覆傳媒時說:「其實係之前佢發生事之後問我借,前後幾次加埋總共幾萬蚊,雖然暫時未還過,我亦冇追佢,因為知道佢呢段時間生活都有困難,又一家大細要養,我知道係唔容易嘅,每個人都有低潮嘅時候,只係盡一點心意,幫吓朋友,江湖救急,令佢度過難關。希望佢努力工作,日後環境好啲,可以清還晒所有債務,重過新生活!」

-----------------------------

《蘋果》英文版免費試睇:了解更多

英文版已登錄《蘋果》App,立即下載/ 更新iOS / Android

-----------------------------

支持蘋果深度報道,深入社區,踢爆權貴,即Like蘋果專題及調查組FB專頁

娛聞樂陪你走遍全球追星,即Like「娛果」FB 專頁!
BannerBanner