電影《諜血街頭》演員林聰突發心臟病逝世 享年75歲

更新時間 (HKT): 2021.02.01 19:59

曾參演過《諜血街頭》及《英雄本色2》等多套港片的資深演員林聰,昨日突發性心臟病離世,享年75歲。《蘋果》今日聯絡過電影工作者總會會長田啟文(田雞),他證實林聰死訊:「真係好突然,噚晚10點幾佢係突發性心臟病離世,林聰2010年就返咗去湛江長住,近年少咗聯絡,佢生前冇聽聞過佢身體有咩唔舒服或有長期病,所以有人通知我佢死訊時,真係好突然。」

回想林聰生前點滴,田啟文說︰「我認識佢時,以為佢係差人(警察),因為佢形象好似,入型入格,好有老差骨嘅感覺。其實我自己都有少少遺忘,畢竟佢返咗大陸10年。」過去一年,有多位前輩離世,田啟文感慨說︰「2020年業界好多位前輩走咗,因為疫情又唔去得醫院,一面都冇得見,呢班老前輩真係買少見少,自己真係好唔開心。」

在澳門出生的林聰,在香港長大,投身影視圈後,曾參演過多套電影《江湖情》、《龍在江湖》及《火舞風雲》等,合作影星更是一綫演員,包括周潤發、張國榮、狄龍等。而林聰亦有拍攝電視劇,其中在《俠客行》中與梁朝偉合作。除了幕前演戲,林聰也有做幕後工作,包括編劇、策劃等。而他更作育英才,田啟文表示林聰不時到學校教表演藝術,或分享演戲心得。其中他在2017年12月,曾到嶺南師範學院與一班學子分享自己的人生經驗、從演生涯,其幽默的講話風格,甚獲學生們受落。

對於林聰逝世,曾與對方在電影《衝擊天子門生》中合作的白彪表示:「好耐之前合作過,好可惜又走咗個朋友!」另外,鄭恕峰在社交網發文悼念,「黑仔」姜皓文貼了3個雙手合十的emoji悼念,但其實黑仔並不認識林聰,亦沒有合作過,他說:「今朝睇到facebook有人出post,又一位老前輩唔係度,覺得好可惜,希望佢一路好走。我只係盡一個後輩嘅禮貌上同一個前輩作最後致敬。但我對林聰叔真係好有印象,因為嗰一脫嘅英雄片真係無得頂,現在都拍唔返。」

-----------------------------

《蘋果》英文版免費試睇:了解更多

英文版已登錄《蘋果》App,立即下載/ 更新iOS / Android

-----------------------------

支持蘋果深度報道,深入社區,踢爆權貴,即Like蘋果專題及調查組FB專頁

娛聞樂陪你走遍全球追星,即Like「娛果」FB 專頁!
BannerBanner