李賞視媽媽李敏為學習對象 遺傳父母基因愛上戲劇

更新時間 (HKT): 2021.02.03 06:00

李賞,才女李敏跟幕後人李進的大女兒,18歲的她遺傳了父母的優良基因,是一個有思想、有夢想的女生。她喜歡電影,中學時已選讀電影的科目,去年更在「全港中學微電影創作大賽」獲得公開組最佳攝影獎,連李敏也笑言要為了女兒急起直追。

受到母親的薰陶,李賞愛上戲劇的舞台,目前希望在幕前幕後不同崗位體驗學習,最近接拍了處女劇、ViuTV的《太平紋身店》,飾演林德信的妹妹,同時是黃德斌的得力助手。李賞未開始拍攝時已被前輩們的氣場壓倒,她說:「第一次拍劇,多咗時候陪住呢個角色成長,係好難得。同唔同前輩合作,個個都好有氣場,一開始真係非常之緊張、好大壓力。不過佢哋好友善,又主動搵我對戲,有講有笑,令到我可以放心入到戲,合作得好愉快。尤其同林德信對手,佢真係好幽默,同佢有好得意嘅火花;黃德斌都好錫我,我哋喺《逆流大叔》有見過面,佢做戲好有氣質,戲外又好友善。最記得第一場戲同周秀娜對手,要好有感情講好多對白,見到大明星又咁靚女,成個人呆咗都記唔到對白,但係佢好好,拍攝過程令到我好舒服,佢仲請我食雪糕三文治,嗰日係我18歲生日,同戲組慶祝,真係好特別。」

從小會跟母親到片場探班,見到大明星感覺好玩刺激,李賞說:「睇到佢哋拍戲見到運作係學到好多嘢,見到劉德華、古天樂,都『嘩』一聲,好刺激。」曾經客串電影《逆流大叔》、《掃毒2天地對決》與《感動她77次》等,全都是飾演年紀與她相若的少女角色,李賞笑言也希望突破自己當打女,她說:「我想試吓做打女,好似周秀娜咁,好犀利,我以前都有學詠春㗎,係時候練番。」

獲父母悉心栽培,李賞去年8月已考進英國著名學府倫敦大學學院(UCL)修讀法律,不過當地疫情嚴峻,李賞暫時留港網上課堂,同時繼續把握機會在娛樂圈追夢。李賞坦言媽媽是自己的學習對象,李賞說:「我揀讀法律,係因為我細細個好鍾意駁嘴,不過只係同其他人駁嘴,唔會駁媽咪。」

父母在行內知名,李賞要入行,心裏也有壓力,她說:「壓力一定有㗎,我會將呢種壓力化成正面動力。因為佢哋唔會畀壓力我,仲有好多自由畀我去做我想做嘅嘢。雖然兩個都係做演藝事業,佢哋冇逼我,畀我空間,唔會係壓迫。」李賞心明父母經歷很多,一生堅強:「佢哋都喺呢行捱咗好多年,我會向佢哋學習,多謝佢哋畀好多睇法我。我會覺得自己好好彩,我會自己爭取機會,繼續努力。我覺得媽咪好勁,除咗幕前幕後仲兼顧埋讀書,舊年讀埋心理學,唔只局限一樣嘢,試唔同嘅嘢,我會好好向佢學習。」

-----------------------------

《蘋果》英文版免費試睇:了解更多

英文版已登錄《蘋果》App,立即下載/ 更新iOS / Android

-----------------------------

支持蘋果深度報道,深入社區,踢爆權貴,即Like蘋果專題及調查組FB專頁

娛聞樂陪你走遍全球追星,即Like「娛果」FB 專頁!
BannerBanner