王梓軒唔想再矇查查做人 扚起心肝做矯視手術重見光明

更新時間 (HKT): 2021.02.04 18:34

被700多度近視纏繞多年的王梓軒,日前終於扚起心肝做矯視手術,進入手術室的前一刻,王梓軒說:「係緊張㗎,我戴咗眼鏡都有20幾年,我10幾歲嗰陣打柔道,嗰陣大約200零300度,都已經矇矇哋,雖然之後戴咗con,但係拍劇拍得耐雙眼都會乾,又成日驚拍啲動作戲,又或者跳海、大風甩咗隻con,搞到完全冇咗求生技能,所以咪把心一橫做手術。」

梓軒見完視光師及醫生驗眼,穿上防護衣並戴上手術帽便進入手術室,醫生先將他一隻眼睛蓋上紗布,另一隻眼睛則用支撐架固定,整個矯視手術大約15分鐘完成,接着加多一個「角膜交聯術」鞏固眼角膜,2項手術全程不多於半小時。手術成功後,梓軒說:「我而家感覺好似有好淺嘅近視,好似有層霧喺度,但係點都好過冇戴眼鏡嘅時候。」

他更搞笑地說:「其實手術過程唔痛,簡單啲講,就似發了一場夢,因為有個激光頭一路埋你隻眼,埋到咁上下會睇到好多顏色,有白色、綠色,然後割開咗眼角膜後,突然間變咗白色,初時都驚,咦!乜都睇唔見,之後醫生一路整啲嘢,見到啲黃色,嗰陣係滴咗啲藥水做角膜交聯術,傷口癒合嗰陣,我睇到橙色燈,又橙又綠,好似睇80年代迷幻嘅MV,好多光咁,不過醫生處理得好好,其中有一part,我舒服到瞓着咗,依家我可以話係重見光明。」

《蘋果》英文版免費試睇:了解更多

英文版已登錄《蘋果》App,立即下載/ 更新iOS / Android

-----------------------------

支持蘋果深度報道,深入社區,踢爆權貴,即Like蘋果專題及調查組FB專頁

娛聞樂陪你走遍全球追星,即Like「娛果」FB 專頁!
BannerBanner