網民翻loop藝人撞樣 「劉德華」做燒焊「周潤發」地盤開工

更新時間 (HKT): 2021.02.04 23:36
大陸奇人奇事特別多,所以就算多A貨藝人亦唔出奇。

藝人最忌「大眾臉」,不過過往亦有唔少平民百姓同明星撞樣。就如擁有14億人口嘅強國,由於勝在人口多,要搵幾個貌似藝人嘅老百姓,未必係難事,而且「還原度」仲奇高。好似早排有個嚟自湛江嘅吳川市民喺街上劈椰子,因為樣貌同髮型同吹神陳奕迅(Eason)生到好似孖生兄弟而爆紅,除咗網民改佢叫「陳椰迅」外,就連Eason亦激罕留言話「果然很像」。

其實過往都有唔少路人或素人被指激似某某藝人,自從「陳椰迅」爆紅後,網民近日又再翻loop一次,喺抖音一次過整合明星撞樣圖輯,當中包括有賣菠蘿嘅洪金寶、燒焊工人劉德華,地盤工周潤發、村民李榮浩、燒餅周杰倫、貴婦黃渤、鬚根周杰倫、平頭陳冠希等。

而歷年模彷劉德華又俾人話似嘅,到現時為止喺大陸至少有5個,當中喺浙江出世嘅陳黎明,因為模仿劉德華把聲,加上外形神似正版,因此被譽為「中國第二個劉德華」。至於今年42歲嘅杜奕衡,同樣因為似劉德華,一入行就有機會喺電影做華仔替身,當中佢就參演過電影《未來警察》、《讓子彈飛》、《龍門飛甲》 是正版的「御用替身」。至於周星馳,多年來亦出現唔少A貨,有A貨星仔仲自稱因為模仿周星馳狂接job,仲話月入過10萬人仔。喺大陸生得一副明星樣,就算係A貨老翻,原來都有唔少着數㗎,果然是,厲害了,我的國!

-----------------------------

《蘋果》英文版免費試睇:了解更多

英文版已登錄《蘋果》App,立即下載/ 更新iOS / Android

-----------------------------

支持蘋果深度報道,深入社區,踢爆權貴,即Like蘋果專題及調查組FB專頁

娛聞樂陪你走遍全球追星,即Like「娛果」FB 專頁!
BannerBanner