Cloud四眼貼地look搭港鐵 同混血男友車廂連體放閃

更新時間 (HKT): 2021.02.05 06:00

ViuTV《全民造星III》雖然已曲終人散,不過一班參賽者的聲勢至今未減,其中素人雲浩影(Cloud)由參賽至今一直觀眾緣旺盛,深得廣告客戶歡心,接廣告接到手軟之餘,亦儲落一班「迷雲黨」黨員。現時Cloud半隻腳踩入娛樂圈,即使出街亦有不少人認出,日前她和混血型仔男友Ryan出街搭港鐵時,亦被《蘋果》讀者楊小姐發現。

據楊小姐表示,當日見到一身平民化裝扮的Cloud和男友Ryan搭港鐵,二人在美孚站上車,楊小姐形容他們最初在車廂內未有傾偈,表情看似有點嬲爆爆,雙方不瞅不睬近5分鐘,直至Ryan拎電話出來,Cloud才將身體靠近男友,此時氣氛稍稍緩和。楊小姐說:「雖然佢哋戴住口罩,但睇得出佢哋有啲面燶燶,企到離行離列,不過個男仔拎電話出嚟遞向Cloud嗰邊,Cloud就好自然同男友頭貼頭,兩個一邊睇電話一邊細細聲傾偈,即使聽唔清楚佢哋講乜,但就終於見到Cloud有啲笑容,呢個時候,個男仔一手將女朋友攬實,之後就聽到兩個咔咔聲笑!」

楊小姐指由於Cloud當日打扮樸素、戴住眼鏡兼沒有化妝,最初她和男友走入車廂時,未有特別留意他們,直至Cloud說話時才認出她。對於被讀者見到同男友放閃,Cloud回應《蘋果》時坦言即使多人認得,亦不會隨便破費搭的士。她更分享在搭港鐵時,曾經遇到一件尷尬事。「其實搭巴士港鐵好正常,不過有次因為趕時間,坐車嗰陣化妝畫眼線,坐隔籬位嘅男仔問我係咪《造星III》阿Cloud,嗰刻隻手就定咗格咁,勁搞笑。」Cloud指即使現時多人識了,但就會保持平常心,亦不會避忌和同男朋友見面。

Cloud在參加《造星III》時,混血男友Ryan已被網民起底,而Cloud事後亦大方承認和男友是當年在校際歌唱比賽時認識,比賽中,Cloud還透露自己是男友的手下敗將,二人拍拖至今7年,感情依然甜蜜蜜。

-----------------------------

《蘋果》英文版免費試睇:了解更多

英文版已登錄《蘋果》App,立即下載/ 更新iOS / Android

-----------------------------

支持蘋果深度報道,深入社區,踢爆權貴,即Like蘋果專題及調查組FB專頁

娛聞樂陪你走遍全球追星,即Like「娛果」FB 專頁!
BannerBanner