造星冠軍丨「軟骨Ben」趙祥誠拍廣告記錄舞者辛酸 被嘲耍雜技最難聽

更新時間 (HKT): 2021.02.05 16:34

趙祥誠(Ben)贏得《全民造星III》冠軍後,工作機會不斷,不單有幾間公司與他斟洽經理人合約,最近更接二連三有廣告上門。最新拍了一波鞋廣告,得到客戶賞識他的舞蹈才華,以記錄片形式展現他的日常生活,又讓他自行於廣告中編舞,自由發揮,雖然是短短分半鐘廣告,卻令主角拍完之後,非常感動。

Ben笑言夢想成真:「覺得好神奇,廣告裏面跳嘅舞步,我構思咗兩個星期左右啦。其實以為拍廣告,梗係要不停show個 product, 冇諗過佢哋將我同product融為一體,從而帶出正能量理念。導演又好信任我,俾我任意發揮去跳舞,成條片將我多年來練舞艱辛同堅持,濃縮晒係裏面,所以自己睇完都好感動。希望令更多人了解到我,又更認識折骨舞。」Ben道出了舞者的辛酸,最難聽是指他不是跳舞,而是耍雜技。因為自學練習時,Ben試過準備定電話叫白車,又試過受傷幾個月動彈不得。不過這些辛酸都沒有令他放棄,「我希望可以繼續透過更多crossover或是出歌等等,成為一個以跳舞為主的歌手,並弘揚折骨舞!」

第一次拍廣告,酬勞是否很滿意?Ben尷尬笑着說:「好滿意呀!幾多錢唔好講啦,新人算好好囉。我會永遠留住呢對粉紅色的鞋做紀念!」據知《造星III》後,Ben的工作機會不斷,「真係好感恩,最近有好幾個廣告再傾緊合作,其他各方面都有好多唔同機會斟洽之中,未決定簽邊間公司,同屋企人仲商量緊,有新消息會再同大家講。」

-----------------------------

《蘋果》英文版免費試睇:了解更多

英文版已登錄《蘋果》App,立即下載/ 更新iOS / Android

-----------------------------

支持蘋果深度報道,深入社區,踢爆權貴,即Like蘋果專題及調查組FB專頁

娛聞樂陪你走遍全球追星,即Like「娛果」FB 專頁!
BannerBanner