岑麗香挺6個月肚賺奶粉錢 囝囝期待「小腰果」出世

更新時間 (HKT): 2021.02.05 18:20

36歲索媽岑麗香,2016年與圈外人老公Joshua(阿強)結婚後,前年一索得男誕下囝囝吳主軒(Jacob)。日前她在社交平台發放孕照再報喜,再懷第二胎三年抱兩,暱稱「Cashew 小腰果」。今日香香快閃銅鑼灣賺奶粉錢,為內衣品牌舉行揭幕儀式,在疫情下香香做足預防,除了保持距離拍照外均戴上口罩。

肥肚唔肥身的香香,穿上金色連身裙,挺着巨肚踏上兩寸高踭鞋現身,見她四肢體態依然纖幼,面色紅粉菲菲,偶爾摸着肚子,香香說:「現時懷孕6個月, BB性別已知道,但唔會講住,想保持少少神秘感,因為有啲屋企人都未知。」她估計自己稍後會忍唔住口。將會當哥哥的Jacob,期待BB出世,經常會摸媽咪的肚,問香香可趁機灌輸訊息:「不過人仔細細,係咪真係知咩事就佢自己先知。」

將BB乳名改造「小腰果」,香香難掩喜悅:「第一次照超聲波時候, BB就好似腰果咁,就叫住先,仲未諗到名,不過我哋唔急。」香香透露再度陀B跟首次有異,胃口大不同:「上次成日好想食pizza,食2個先滿足,今次每日起身第一件事要食火腿蛋治,陀唔同小朋友有獨特感覺。」雖然孕味濃,但香香並未見水腫情況,她說:「而家仲早,臨尾衝刺階段先會腫。」

日前香香在社交平台照片中,明顯升級,但今日卻未見突出,她尷尬表示:「真係冇咩?睇入面着乜,唔解釋太多,遲早都會。」現時她的體重增加了約10kg。至於老公強強有沒有提供女皇級對待,香香笑說:「冇喎,因為有Jacob,樣樣都阿仔第一,都好正常。」香香暫時處於安胎狀態,間中會客串網上頻道工作,拍劇則免:「時間太長,我驚我會瞓着,而家有個人仔同我分享營養,好容易攰同眼瞓。」香香老公強強開展時裝生意,有傳她會擔當幕後角色助夫發展:「嗰日佢拍嘢,我係佢PA仔(助理),我做慣拍攝,識得嘅都會幫手,個項目係佢,由佢自己發揮。」而她否認做代言人發展時裝王國:「交畀佢,我負責安胎,個品牌係男裝,唔關我事㗎。」

-----------------------------

《蘋果》英文版免費試睇:了解更多

英文版已登錄《蘋果》App,立即下載/ 更新iOS / Android

-----------------------------

支持蘋果深度報道,深入社區,踢爆權貴,即Like蘋果專題及調查組FB專頁

娛聞樂陪你走遍全球追星,即Like「娛果」FB 專頁!
BannerBanner