陳自瑤做YouTuber 隻字不提王浩信 自嘲39+1終於知自己要乜

更新時間 (HKT): 2021.02.06 12:24

陳自瑤(YoYo)前晚在社交平台表示有消息宣佈,叫大家要「密切留意」,結果有不少網民食住花生等睇戲,有人估係想講「獨立宣言」,亦有人估係同工作有關。直到昨晚YoYo揭盅,原來她籌備了一年的YouTube頻道正式成立!

雖然等緊食花生嘅網民覺得失望,但係都有唔少人訂閱,開咗13個鐘左右,已經有接近1萬人訂閱,第一條片都有3萬幾人睇,睇嚟呢個「密切留意」都幾有吸引力。喺第一條片,YoYo準備咗11條聲稱係網民最想知嘅問題,但係聽極都冇講到佢同王浩信而家嘅關係究竟係點?係咪離咗婚?只係聽到分享凍齡秘訣、點解唔畀個女王靖喬曝光,點解IG會冇晒啲相同埋點解好似少咗拍劇,唔知YoYo係捉唔到啲網民口味,抑或係閂埋門扮聽唔到就算!

今年8月即將39+1嘅YoYo,佢都有講吓喺呢幾年嘅轉變:「我記得喺20歲嘅時候,仲係傻更更,完全唔知自己做緊啲乜嘢;去到30歲左右,我應該係結婚有小朋友,要去學習做一個媽媽同照顧家庭,嗰陣同少女時代係好唔同,原來有好多嘢要學習,係一個學習階段。到咗39+1,而家會更加清楚了解自己想要啲乜嘢,應該點樣去行。」佢仲話自己最鍾意係而家嘅階段,個人成熟咗,清楚知道自己要乜嘢,對佢嚟講係最好。

之不過就算講到家庭,YoYo堅持唔講有冇話要學習點樣做一個老婆,但係佢承認自己都有壓力同唔開心嘅時候,佢只係容許自己唔開心一段短時間,因為仲有好多事要繼續做,惟有用一個比較正面嘅態度向前行:「每一個人都唔容易,大家都有自己嘅煩惱同壓力,我都想透過啲正能量,鼓勵自己之餘,都可以鼓勵其他人。」

-----------------------------

《蘋果》英文版免費試睇:了解更多

英文版已登錄《蘋果》App,立即下載/ 更新iOS / Android

-----------------------------

支持蘋果深度報道,深入社區,踢爆權貴,即Like蘋果專題及調查組FB專頁