余慕蓮入院3個月嗌悶爆喊想死 林建明電話開解鼓勵

更新時間 (HKT): 2021.02.06 11:49
(FB圖片)

現年83歲的余慕蓮(魚毛),去年11月6日晚因肺纖維化而入伊利沙伯醫院ICU接受治療,傳她患上罕見血癌,由於細菌入肺,魚毛要進行換血手術,及插喉呼吸,情況一度危殆,幸經醫生搶救後情況已有好轉,並已由ICU轉往普通病房,及由伊利沙伯醫院轉往九龍醫院醫治,但因為未能自行進食,仍要插喉管輸入流質食物和營養素。

事隔3個月,魚毛仍在醫院留醫,據她好友林建明(大姐明)透露,魚毛在護士幫忙下,已可跟朋友傾電話,但就因為要臥床和苦悶感到極不開心而爆喊,甚至一度揚言要死。

大姐明日前接受《蘋果》訪問時,透露魚毛入院後首次跟她視像傾偈時爆喊:「佢入院時冇諗到係咁,佢諗住自己check check乜嘢事就走得,點知一入去就成幾個月,又唔知乜嘢事又昏迷,佢接受唔到,所以咪喺度喊囉!」

講到魚毛近況,大姐明說:「魚毛而家好有進步,佢轉咗去九龍醫院,而家要練習食嘢,因為佢仲係插緊喉,食唔到嘢,個肺仲有啲喉管同佢調理緊,大概每一日都畀佢練習食嘢同埋講嘢,呢期佢就可以打電話畀我哋嘞,於是佢又打畀我,打畀安德尊、吳麗珠,同埋佢契細佬講佢情況,因為佢之前都好活躍吓,但佢已經瞓咗喺度2個幾月,佢就覺得好悶,想講嘢又唔係有機會講到,食嘢又食唔到,佢話有時想死,我話:『唔怕!堅強啲,都成2個幾月,唔爭在啦,快啲出到嚟過農曆年啦!』如果佢練到食嘢呢,咁就好喇,有返力量,佢就可以坐到同行到,佢而家就未可以自己食嘢,於是都係瞓床,或者姑娘幫一幫佢坐喺櫈度活動吓。」

-----------------------------

《蘋果》英文版免費試睇:了解更多

英文版已登錄《蘋果》App,立即下載/ 更新iOS / Android

-----------------------------

支持蘋果深度報道,深入社區,踢爆權貴,即Like蘋果專題及調查組FB專頁

娛聞樂陪你走遍全球追星,即Like「娛果」FB 專頁!
BannerBanner