梅小惠得星仔訓練急才 當年跟曾偉權分手體重暴跌至98磅

更新時間 (HKT): 2021.02.07 12:41
梅小惠與曾偉權分手後,體重曾暴跌至只得98磅。(資料圖片)

梅小惠入行36年,2004年拍罷《皆大歡喜》後沒有再拍劇,決心淡出幕前轉做巿場推廣,最近更兼做製作總監,找來好友阮兆祥和黎耀祥主持《雙祥見》。小惠日前接受商台《1圈圈 星光背後》訪問,提到當年在TVB年多次與未走紅的周星馳合作,當中《蓋世豪俠》、《他來自江湖》等更是經典,她說:「星仔當時唔cool,其實係佢訓練我嘅急才。嗰時好忙,《公私三文治》同《他來自江湖》同時拍,但跟星仔拍時,讀熟晒劇本都冇用,因為去到先知拍咩,就好似扮樹嗰場戲,根本冇對白!嗰時導演係李力持,次次現場都聽到佢同星仔一齊改劇本笑到卡卡聲,呢樣同我喺訓練班學嘅好唔同。(背熟劇本但冇用有冇嬲?)最初係有啲唔適應,但演員都係聽導演話。」

梅小惠另一事業高峰是2001年開始拍攝古裝處境劇《皆大歡喜》飾演「豬頭美」,但劇集拍到2004年時裝版時,曾爆出她與趙學而因遲到鬧不和,之後劇集未完小惠就退出劇組,後來更索性轉行絕跡幕前。問小惠轉行是否與不和是非有關?小惠說:「我哋冇不和!(有因遲到嘈交嗎?)首先,我自己從來冇遲到!家姐梅小青訓練我咁耐,每日通告我都會比化妝更早到。我想講《皆大歡喜》合作咗咁多年,有開心亦有磨擦,但離開劇組或離開幕前都唔關任何人事,係我感覺到無論演戲或做主持行到某個位,加上年紀已經唔細,想進步及挑戰自己。《皆大歡喜》係群戲為主,我認為少咗我影響唔大。」

去年11月底,梅小惠的初戀男友兼唯一承認過的戀人曾偉權因癌病離世,終年59歲。二人於1986年在亞視邂逅相戀,最終因第三者介入於1999年分手,談及曾偉權生前曾接受周刊專訪說過承認對她有歉意,並坦言「蹉跎了她的歲月」,小惠說:「我有睇過權權呢個專訪,佢太客氣嘞,我已放低好耐,佢亦應該放低。人生會有唔同過客,應該記得及珍惜佢嘅好,不好嘅就要忘記,否則只會折磨自己。一路以來,我係好感激權權由我21歲開始對我嘅保護,令我冇畀人呃,亦讓我有咗小家庭嘅感覺,等我可以專心工作。到最後要分開,唔係盡是單方面嘅責任,或者我都係有啲嘢冇做好。」對於曾偉權在訪問中指分手前小惠想結婚,而他想事業做好些才計劃,結果變成分歧,小惠坦言:「我相信大部份女仔拍咗拖十幾年,冇邊個唔想結婚,我哋係有憧憬過,但最後關係因乜走唔到另一階段,我真係忘記咗,總之有問題啦。」

小惠透露當年分手後需一段時間復原,這次打擊曾令她瘋狂購物兼體重跌至98磅,至於去年曾偉權患癌到辭世,小惠指是透過家姐梅小青才得悉消息,「事前真係唔知權權患癌,只知佢有唔舒服。始終我哋交往咁耐,佢同我家人嘅關係好好,佢走嘅一天,家姐打電話問我有冇收到消息,嗰時我同客戶開會中,好冷靜。係第二日記者先證實消息,亦好感激權權讓我有一天晚上嘅時間回憶佢對我嘅好,能自然真心回答大家。」

-----------------------------

《蘋果》英文版免費試睇:了解更多

英文版已登錄《蘋果》App,立即下載/ 更新iOS / Android

-----------------------------

支持蘋果深度報道,深入社區,踢爆權貴,即Like蘋果專題及調查組FB專頁

娛聞樂陪你走遍全球追星,即Like「娛果」FB 專頁!
BannerBanner