孫慧雪與媽媽失聯20年 聞死訊瀕崩潰:呆咗一陣先喊出嚟

更新時間 (HKT): 2021.02.07 15:21

孫慧雪在單親家庭中長大,一直由嫲嫲照顧,曾透露已經有很多年沒有見過媽媽。去年4月,阿雪在酒店自我隔離期間,表弟透過社交網聯絡問她「想唔想見番媽咪」,豈料卻傳來一張墓碑相,原來阿雪的媽媽早在20年前已離世,一開始難以接受,情緒崩潰。

阿雪多年來亦有幻想過見到媽媽,以為搬屋才失聯,有時會好奇為何不找她,亦會想媽媽有沒有看過自己的演出。阿雪亦想盡一點孝心照顧對方,但原來一切都是自己的幻想,阿雪今日接受傳媒訪問時說:「好細個嘅時候,有幻想過媽媽喺身邊,但因為太耐冇見過佢,亦都有諗過見返會唔識點面對!一路覺得我媽咪生活得好好,到某個時間會見番,但當知道嘅時候係有少少崩潰,反應唔嚟,件事係有啲消化唔到,呆咗一陣先喊出嚟,好彩老公一直有陪住我。生活都係要咁過,而且自己有小朋友,好好珍惜自己而家擁有嘅嘢!」而當中最諷刺的是媽媽離開時候是38歲,而自己得知這個消息亦是38歲。

阿雪之後跟舅父去拜祭媽媽,她表示不太清楚媽媽的死因,但相信是心臟麻痹。阿雪早前為好友方紹聰(奶仔)主持的J2台節目《野外步出》擔任嘉賓,提及媽媽離世一事,透露自己都有心臟病,要長期服食心臟病的藥物。但為演出效果,阿雪竟參與高危的攀石運動,她在鏡頭前高呼:「之前做身體檢查,照心電圖發現有心臟速跳,跳得好混亂,原來有條重要血管塞咗50%,我本身低血壓同低膽固醇,醫生一度以為畀錯報告我,最後發現我有先天性血管收縮問題。雖然我不嬲好健康,但都有呢啲問題,要長期食藥。」令人看得一額汗。

阿雪今日亦在IG報平安:「大家睇到報道可能有啲擔心,我真係好ok! 唔使擔心呀!而且件事已經發生咗一段時間,感受亦經已沉澱,身體方面都ok呀!唔係想像中咁嚴重㗎!只係拍攝前要同工作人員交代下,結果就喺節目到透露咗出嚟,其實唔係咁大件事,我都係咁健康開心,所以大家可以放心放心!」

-----------------------------

《蘋果》英文版免費試睇:了解更多

英文版已登錄《蘋果》App,立即下載/ 更新iOS / Android

-----------------------------

支持蘋果深度報道,深入社區,踢爆權貴,即Like蘋果專題及調查組FB專頁

娛聞樂陪你走遍全球追星,即Like「娛果」FB 專頁!
BannerBanner