朱千雪自爆嫁青梅竹馬醫生原因 岑杏賢誇金融才俊老公係極品

更新時間 (HKT): 2021.02.08 18:34

朱千雪、湯洛雯(靚湯)、岑杏賢及蔣家旻被戲稱為「2Line黨」,日前她們擔任林盛斌(Bob)與麥玲玲主持的訪談節目《師父有請》訪問嘉賓,戲言不曾承認「2Line黨」的名字,而且已經由二線跌落三線,靚湯即反駁:「我哋私底下個群姐名叫『幸福公主』,除咗我哋仲有張嘉兒。」

今次訪談主題為「嫁得好」,朱千雪和岑杏賢先後跟醫生及金融才俊結婚,岑杏賢說:「起初同老公第一次見面係完全冇興趣,好唔鍾意佢,唔明點解朋友會介紹畀我認識,佢外表唔係我想要嘅類型。我好膚淺,本身就諗住索性搵番娛樂圈嘅人就算,直至遇到我老公之後,簡直係極品,感覺佢優點比我想像更加多。」靚湯即踢爆岑杏賢是她們之中最追求靚仔的一個。

朱千雪嫁給青梅竹馬的醫生,問她是否覺得自己老公靚仔 ?朱千雪呆足三秒才回應:「我覺得靚仔咪得囉!我入行8年冇人追過。」靚湯搶住答:「我知點解,如果有人主動問佢攞電話,佢會答人『你Send e-mail畀我』。」朱千雪解釋:「因為我覺得自己唔係好鍾意識好多人,呢個朋友圈舒服就圍繞住,咁我同而家老公細細個就認識,感覺好安全,同埋唔需要用好多時間去認識大家,咁多年遠距離戀愛我都好信佢,佢亦好信我。」

堪稱異性絕緣體的朱千雪直言有次和某男影合照,對方問她電話號碼想Whatsapp照片給她,卻遭冷回一句「我張相你Keep啦」便一口拒絕了,她更說:「就算拍劇男拍檔嘅電話都冇,唔需要,要聯絡會搵PA(助理編導),唔係冷漠,只係心態上覺得無需要,就算未正式拍拖前,我個人本身性格就係咁,所以同我老公傾偈好舒服,唔使好深入了解,又唔驚佢呃我。」

湯洛雯厭倦回應婚期 指馬國明未求婚

靚湯再踢爆朱千雪會堅拒拍劇有性感或Kiss戲,兼相當理智不會戲假情真,朱千雪坦言:「如果可以唔需要就最好唔好。有場戲安排我喺天台跌落去時,男主角要扯住我,扯爛件衫,見到露膊好性感咁。我唔係唔想性感,而係我又唔係瘦,做嚟都嘥氣啦!我就將裏面件背心同外面件背心縫埋,扯極都係見到少少膊頭,而且我又怕被人cap圖,話我手臂肥。」阿Bob驚訝朱千雪拒演性感和接吻戲,她笑說:「如果我有腹肌同40吋腿可能唔同講法。」

至於多次被外界催婚的靚湯坦言,喜歡的男人要像她爸爸般又乖又愛錫家庭,而父母性格就一凹一凸。問到男友馬國明是否達標?她說:「我鍾意講嘢,佢都會出聲話『你鍾意啦』、『幾好吖』、『無所謂啦』、『激死我』咁囉。」對於多次被催婚,她自言不會有壓力:「係問到有少少厭,有少少答到呆咗。次次都問,答咗唔係,我女仔嚟呀嘛!人哋都未求婚,咁我點答你啫?訂婚一定會講,大家唔使再問,一定公開。」

之前靚湯和馬明公開戀情用公仔表達,問她到時宣佈婚訊會也用公仔表達?靚湯笑說:「你唔好理啦!唔好褻瀆我兩隻公仔。」麥玲玲表示如果女星在娛樂圈上到一線超紅的話,就一定不會嫁得好,因為兩粒星是相沖,除非結婚後急流勇退,而四女的命盤所計,蔣家旻是最適合在娛樂圈發展,將來婚姻要嫁得遠,才能開花結果。

朱千雪否認退出:「我想做,家庭同事業要平衡,以前係事業以外就自己煲劇,而家係事業以外,老公想煲咩劇就一齊煲,工作上無分別。」岑杏賢稱自己會先尊重老公的意願,而靚湯稱婚後會繼續衝事業,但如果生育後就會希望自己全力照顧小朋友。」提到生小朋友,千雪說:「我好驚生BB係因為我怕肥,我未生已經被傳媒講到我起碼生咗3件咁,話我有咗5個月,傳聞真到連我自己都猶豫!」

-----------------------------

《蘋果》英文版免費試睇:了解更多

英文版已登錄《蘋果》App,立即下載/ 更新iOS / Android

-----------------------------

支持蘋果深度報道,深入社區,踢爆權貴,即Like蘋果專題及調查組FB專頁

娛聞樂陪你走遍全球追星,即Like「娛果」FB 專頁!
BannerBanner