咖啡的香氣愛情的味道 《咖啡館的那些小事》情人節的小禮物 瘟疫蔓延時的小確幸丨果燃上架

果燃電影丨咖啡館的那些小事

更新時間 (HKT): 2021.02.08 00:00

活喺大時代嘅漩渦,活喺瘟疫蔓延嘅時候,轟轟烈烈嘅愛情沉重得令人吃不消,我哋同幸福嘅距離永遠都只係一步之遙,但係呢一步嘅距離就好似瘟疫一樣反反覆覆,時好時壞見唔到終點。所以我哋都開始追求「小確幸」。「小確幸」一詞源於村上春樹嘅隨筆文集《蘭格漢斯島的午後》,「小確幸」嘅意思係生活中微小但確切嘅幸福。情人節將至,無論你有冇情人都好,果燃台都為你準備咗一份小禮物:《咖啡館的那些小事》系列,3個關於愛情嘅小故事,3段發生喺咖啡館嘅小時光。每段6分鐘,當你覺得自己有小小不幸嘅時候,睇一睇,然後感受一下嗰種微小而確切嘅幸福。

狐狸小姐-獻給所有曾為愛情奮不顧身的你,所有的狐狸小姐。

一按到果燃台收睇 果燃電影丨咖啡館的那些小事-狐狸小姐

「嗰日好大雨,我望住玻璃窗,我見到落雨嘅加州,我突然好想知道另一個加州係咪好好陽光。」重慶森林嘅經典對白。狐狸小姐係一個經常光顧咖啡館嘅神秘少女,每一次佢都會問店員:「而家幾多點?」所以店員都叫佢狐狸小姐。狐狸小姐經常畀人一種陰天嘅蒼白感而且冇時間觀念,原因係佢嘅陽光喺比香港慢咗15個鐘頭嘅加州。

背結他的人-送給所有,在途中的人。

一按到果燃台收睇 果燃電影丨咖啡館的那些小事-背結他的人

佢叫阿逸,佢有一支結他,同一個夢想。每個星期五、六佢都會喺咖啡館獻唱,佢嘅夢想唔係咖啡館而係紅館。但係無論佢唱得幾好、幾落力都冇人有反應,因為個場根本冇人。你會話,而家連Eason都係咁啦。欸,故事發生嗰陣都仲未有武漢肺炎呢。阿逸唔係唱得唔好,只係佢唔明紅嘅唔一定要唱得好,唱得好又唔一定會紅嘅呢個事實。唔知你對上一次放棄夢想係幾時呢?又會唔會有個紅顏知己嚟叫你唔好放棄呢?

BFF-獻給所有又愛又恨的BFF。

一按到果燃台收睇 果燃電影丨咖啡館的那些小事-BFF

Best Friend Forever,以前叫手帕交、孖公仔、枕邊友、閨密。通常形容女生。BFF呢種生物會無所不談,行街、shopping、旅遊、月經甚至對方嘅情人。佢哋會因為太熟絡而口不擇言,會因為太坦率而唔小心踩到對方嘅地雷,佢哋會嗌交,會反目,會冷戰,然後發現唔可以冇咗大家。呢一日淇淇(陳漢娜飾)同蔓莎(張蔓莎飾)嗌咗場大交,就喺轉角嗰間咖啡館。

《咖啡館的那些小事》Cafe Around The Corner,與咖啡無關,亦冇轟轟烈烈嘅愛情,只有3款唔同口味嘅小確幸,都係一啲雞毛蒜皮嘅日常小事,但係呢啲小事,可能都係某個人回憶裏面最重要嘅事,某個人生活中微小但確切嘅幸福。《咖啡館的那些小事》系列,《狐狸小姐》,《背結他的人》,《BFF》,果燃台現已上架。不如就去轉角嗰間咖啡館點杯精品咖啡嘆住嚟睇,順便救救瘟疫政治下就嚟死得嘅小店。

果燃台 | 果迷專屬嘅影片世界

-----------------------------

《蘋果》英文版免費試睇:了解更多

英文版已登錄《蘋果》App,立即下載/ 更新iOS / Android

-----------------------------

支持蘋果深度報道,深入社區,踢爆權貴,即Like蘋果專題及調查組FB專頁

娛聞樂陪你走遍全球追星,即Like「娛果」FB 專頁!
BannerBanner