童星張預東細個為避債搬屋 曾做邊青加入黑社會:壞過凱婷好多

更新時間 (HKT): 2021.02.08 00:30

90年代《閃電傳真機》的精靈童星「東東」張裕東(現改名張預東),鏡頭前是永遠的開心果,但鏡頭後的童星生活,原來過得一點也不快樂。「唔知點解,好多人覺得童星就係有錢仔,其實我剛走(離開無綫),有啲朋友都話『你唔怕㗎啦你』,我都唔知點解我唔怕,好似覺得我發咗達咁。」

東東是名副其實的「屋邨仔」,自幼家庭環境複雜,日前重返成長地方,用熟悉的聲音導航,彷彿稚氣未脫:「呢度係小西灣邨,我長大嘅地方,小西灣分上邨同下邨,我就巴閉嘞,上邨下邨都住過,點解呢?因為以前細個欠人錢,被迫要搬屋,所以住過兩間公屋。」東東沒有開口說出「欠錢人」是誰,心中顯然仍有一根刺,「媽咪一個人湊大我同家姐,屋企人爭人錢,後來離晒婚,某程度上有經濟負擔,呢件事(童星)都幫到屋企。但之後自己曳,家姐乖,湊我好辛苦,所以童年日子唔係過得好舒服。」

5、6歲入行做童星亦有段故,「當年高班升小一暑假,扭計要媽咪帶我去電視台玩遊戲。媽咪買咗份《TVB周刊》,幫我同家姐梅花間竹咁填晒全版報名表格,咁橋嗰一期唔係玩遊戲,而係走入大染江招考小演員,咁啱寫咗我自己。」東東由一千幾百位小朋友中脫穎而出,之後加入《閃電傳真機》做小主持,由於夠醒目又口齒伶俐,當年拍劇、拍電影以外,還以「東東大師」之名出碟及客串主持電台節目,非常忙碌。

感激肥姐後台鼓勵

當年東東大師和陳奕合唱的《Bala Bala Bu》更成為1997年度兒歌金曲頒獎典禮十大金曲之一,他緬懷過去亦表現得很雀躍:「嗰時兒歌好多人聽㗎,觀眾同表演者都好期待個頒獎禮,唱live又載歌載舞,仲有好多明星,張學友、郭富城、Twins、陳奕迅……,嗰時玩兒歌真係正。」不過,令東東最難忘,並不是一班紅星出場,而是已故藝人沈殿霞,東東說:「其實以前上台前都會好緊張,一緊張隻腳就震,自己都呃唔到自己。一次好深刻,有次《兒歌金曲頒獎典禮》,肥姐係司儀,原本布幕一打開,我就要講大約一分鐘嘅稿,我係超緊張,嗰刻我就知道乜嘢叫大將風範,肥姐拍一拍、攬一攬我話:『東東唔使驚,做返你頭先full dress rehearsal嗰個就得。就係一句說話令我個人冇咁緊張,你會覺得係一個大姐姐、一位前輩撐一撐你,佢咁有經驗,真係睇得出,而佢一句說話又真係幫到我,勁呀勁呀!」

東東曾誤入歧途

每個人都有自己的路,80年代出身的童星柏林仔,離開娛樂圈後選擇投考督察,比柏林稍遲入行的東東卻誤入歧途。曾有報道指東東19歲那年縱情玩樂,過着荒唐歲月,東東沒有說清前因後果,但直認自己雖然是名校華仁書院舊生,但曾經學壞,荒廢學業,中二、三已經開始食煙,他引用網上潮語笑着說:「壞過凱婷!加入黑社會?都有㗎,過咗去唔怕講,嚟到我長大嘅地方幾好,屋邨仔又點,壞過咁又點,知道自己唔好就改咗佢,我係壞過凱婷好多倍,但冇傷害人,只係傷害自己啫。」有沒有坐過監?他說:「冇試過……總之係一啲年輕人可以做嘅壞事都做晒,但我又返到轉頭,人大自然諗通。」

東東年幼時亦遇過不少霸凌事件,「以前細個做童星好慘㗎,喺街頭已畀人話《12隻恐龍》,街尾又笑你《閃電傳真機》嗰個,但諗返又冇乜嘢,依家想俾人笑都冇啦,其實都幾好。」但有一件事卻令他氣上心頭,「以前上連登成日俾人鬧,最嬲一次係有人話見我喺月台打阿媽,嗰陣未有網絡欺凌呢啲字眼,話我學壞唔緊要,傷害自己啫,但話我傷害我阿媽喎,呢個真係頂住!吹水,我俾阿媽打就有,我點敢打阿媽!」

採訪:嵐山

攝錄:陳慧安、廖達燊

-----------------------------

《蘋果》英文版免費試睇:了解更多

英文版已登錄《蘋果》App,立即下載/ 更新iOS / Android

-----------------------------

支持蘋果深度報道,深入社區,踢爆權貴,即Like蘋果專題及調查組FB專頁

娛聞樂陪你走遍全球追星,即Like「娛果」FB 專頁!
BannerBanner