TVB編劇初步確診 10名同事列緊密接觸者等入隔離營

更新時間 (HKT): 2021.02.08 17:34

武漢肺炎肆虐,《蘋果》接獲消息,無綫再有員工初步確診,而TVB人事及行政部已透過員工App通知全體員工,指節目發展分部一名男見習編劇的家人早前確診。該名TVB編劇昨日初步確診,已送住醫院,上周五該名編劇仍有上班,目前有10名同事曾與他接觸,被列為緊密接觸者。

林盛斌(Bob)今午回TVB開工錄《送鼠迎牛開運王》,得知一名見習編劇確診,Bob說:「吓!係呀!我諗而家我哋都有做晒防護措施,入嚟又會消毒,拍嘢嗰陣又會戴口罩,除咗做訪問可能要除咗佢,所以我哋啲防疫意識做得好好,頭先有同事叫『阿Bob搓一搓手』,又提我幾時就要戴返口罩,呢啲我哋都會做。」

而同場的衛志豪則說:「係咩?幾時嘅事,我唔知,佢冇事吖嘛!一定擔心嘅,近排個案都爆得犀利,但係我哋如果要開工,各位手足都有做好預防措施、守規矩,幕後一定要戴口罩,盡量保持距離,大家都好想遵守限制,之不過工作需要,有時真係好難,但係大家都盡量謹守,喺疫情期間,大家見到我哋有開工,好少有感染,呢一點好慶幸,香港人可以做得到,大家想回復以前嘅自由同開放,大家就唔好嫌麻煩去做檢測,檢測對大家都好,已經係公民責任,如果可以一齊去做,我相信香港可以好快『清零』,希望可以咁樣!」

下午5點幾,TVB員工在車站上落車時,對於有同事確診亦不願多談,大多耍手擰頭、不肯停步受訪,紛紛表示沒收到消息,「我唔知,都會擔心,自己做好防疫,前日先去驗測,冇事」、「唔知道,有事咪去(驗)囉」、「我今晚先返夜,所以唔知道」、「我都係睇新聞先知,最重要係自己做好防疫,勤力搓手、戴口罩,不過自己暫時未需要做檢測。我返到去公司都會了解吓,應該對我唔會好大影響」。

據知昨晚TVB收到衞生署通知,將安排10位同事接受隔離檢疫至2月19日,即農曆新年要在檢疫營中度過。至於公司7樓及其他相關地方已經全面消毒清潔。

最近港府連續多日加辣封區,只要大廈新增一宗或以上源頭不明個案,都圍封進行強制檢測,包括柴灣、觀塘、九龍城、尖沙嘴、油麻地、深水埗、佐敦、元朗等多幢大廈都要接受強制檢測。現TVB再有同事確診,不知政府會否加辣處理,去檢測污水樣本呢?

-----------------------------

《蘋果》英文版免費試睇:了解更多

英文版已登錄《蘋果》App,立即下載/ 更新iOS / Android

-----------------------------

支持蘋果深度報道,深入社區,踢爆權貴,即Like蘋果專題及調查組FB專頁

娛聞樂陪你走遍全球追星,即Like「娛果」FB 專頁!
BannerBanner