姚子羚讚李施嬅未婚夫有風度 聞接棒出嫁:可能胡定欣搶先

更新時間 (HKT): 2021.02.09 15:10

39歲李施嬅昨日晒出3卡巨鑽宣佈訂婚,趕在「四字頭」前成為人妻,李施嬅自言有甜蜜的新嘗試,希望牛年一定會更好,而胡杏兒指一班好姊妹早已知道此事,好戥李施嬅開心。今日麥玲玲師傅、陳山聰及姚子羚出席大台活動,玲玲師傅送上不同的門掛給嘉賓,祝姚子羚嫁人,陳山聰拿視帝。

姚子羚受訪時稱替好友李施嬅開心:「我哋知,不過就唔知佢係噚日宣佈,佢講之前冇通知我哋,戥佢開心!因為佢肯將呢個咁開心嘅消息話畀全世界嘅人聽,分享呢份喜悅,希望佢哋白頭到老、永結同心,等疫情快啲過,搞一個婚禮,咁我哋可以做姊妹。」

姚子羚指見過李施嬅未婚夫:「見過!其實本身係我識嘅,佢係一個好風度、心地善良,對事業好努力、工作好有熱誠嘅男人,最重要係佢好錫施嬅,咩都以施嬅為先,會覺得同呢個人相處好舒服,希望佢哋兩個繼續甜甜蜜蜜、開開心心快啲生BB。」

講到不少人看好胡說八道姊妹中,姚子羚和黃智雯應該會繼李施嬅之後接棒做人妻,成為胡說八道會第四位結婚的成員,之前跟夜店董事男友Raymond傳復合的

姚子羚笑言可能畀胡定欣搶先:「呢啲真係唔知,可能胡定欣嫁先呢,呢樣嘢我哋大家冇去諗太多,總之邊個結婚、邊個生小朋友都好,都係一件開心嘅事,希望胡說八道會有更加多嘅喜事發生,唔一定係結婚生仔,可以係其他方面,譬如攞獎、置業、做生意咁都可以。」

早前有傳姚子羚跟夜店董事男友Raymond復合,問到她今年情人節有甚麼節目,姚子羚反問:「情人節好似係初三嚟?初三係赤口,我成日都好想打麻雀,因為好似好耐冇打牌,可能搵屋企人陪打麻雀。冇諗呀!因為今年疫情,真係冇乜地方可以去,多數留喺屋企,同家人就咁食餐飯,冇咩特別諗要點樣過,希望有時間行吓花市,視乎多唔多人,如果太多人就唔去啦!」一講到情人節,姚子羚刻意避談另一半。

此外,陳山聰每年有找師傳睇流年,笑言今年發展不俗,暫時未想爭視帝,只希望7個月大的兒子霆軒(Jaco)快高長大、身體健康,陳山聰一講兒子即笑晒:「今年佢好快就識行,我嚟緊都開新劇,望開工大吉,我而家都放緊假,新年嘅嘢都係老婆準備,我哋好簡單,抹吓嘢、貼吓揮春,一早幫囝囝買紅色衫,點知我訂咗厚身衫,不過聽講新年會好熱,而家要重新搵薄身衫,其實我哋都唔會點出街,始終囝囝陪過第一個新年,喺屋企開心吓、影吓相。」

講到好拍檔李施嬅公佈喜訊,陳山聰稱昨日第一時間發訊息恭喜身在加拿大拍劇的李施嬅,陳山聰詐型:「我連佢拍拖都唔知,佢收得好密,其實係好事嚟,佢想保護自己,希望佢哋恩恩愛愛、幸福快樂!等佢返嚟香港,我哋再慶祝,有咩要幫手就隨時出聲,生個小朋友就可以同囝囝一齊玩吓。」

-----------------------------

《蘋果》英文版免費試睇:了解更多

英文版已登錄《蘋果》App,立即下載/ 更新iOS / Android

-----------------------------

支持蘋果深度報道,深入社區,踢爆權貴,即Like蘋果專題及調查組FB專頁

娛聞樂陪你走遍全球追星,即Like「娛果」FB 專頁!
BannerBanner