薛家燕年廿八做滅菌隊長 揸雞毛掃趕走疫情霉氣

更新時間 (HKT): 2021.02.09 00:30

年廿八,洗邋遢,薛家燕雖然工作忙碌,但都要趁這個時候大掃除!日前,她帶齊裝備——抹布、水盆、噴霧器、膠手套、除塵寶和雞毛掃,返到新城電台清理自己枱面,戴好手套就着手抹枱面、鍵盤等。由於疫情關係,她亦有用酒精濕紙巾抹電話,亦有消毒噴霧,不過拎起雞毛掃,家燕姐表示勾起童年回憶,她笑說:「我哋嗰個年代就用雞毛掃,第一可以掃塵,第二邊個曳曳就『fit』落去,嗰陣時我都好曳,所以被我爸爸罰過好多次,所以見到雞毛掃,我就有啲驚,而家係咁意用吓,而家用抹塵布就好方便。」

家燕姐透露年廿八前一星期,已開始家居大掃除,由於她過去一年經常演出,衣服都會好多,所以要清理一下,送給他人或者捐出去。會否親自清潔?她笑說:「坦白講,我冇咁多時間,但會做一個時間表,話畀我啲傭人知道,尤其是雪櫃入面有啲放咗成年,唔食得就要掉,原來化妝品都好多,有啲原來用咗一陣間又唔記得咗用,所以要年廿八前一星期開始,如果唔係唔夠時間。」

家燕姐雖然是基督徒,但她都會依照中國傳統習俗過農曆新年,她說:「年三十晚食團年飯,今年好開心,好多朋友送盆菜、花膠、溏心鮑魚過嚟,所以今年團年飯將會喺屋企食,但湯就一定自己煲。我哋傳統喺年三十晚煲蓮藕章魚豬腱湯,寓意路路相通,樣樣順利,大年初一又唔會掃地,大年初二食開年飯。」家燕姐透露家中會貼揮春外,還會擺放水仙、蘭花和大桔,問到會否擺桃花?她笑說:「唔會,因為我爺爺、我爸爸,一路落嚟都話我哋姓薛唔擺得桃花,所以我一直都冇擺桃花。」

最近,家燕姐推出自家品牌的曲奇餅賀年全盒,盒內除有曲奇餅外,更附有一張50元禮券、印有其肖像的財神爺利是,家燕姐表示:「每年個個都要攞我封利是,因為大家覺得攞咗我封利是會好運,如果畀到大家好運,我派利是係唔緊要,當係我一個心意,所以我可能比舊年會派得多,希望大家牛轉乾坤。」其實疫情令家燕姐去年失去了內地、星馬、美加登台的機會,收入嚴重影響,問到是否損失近7位數字收入﹖她點點頭說差不多,幸好本身都會積穀防饑:「都有飯食,食少啲,當減肥囉,我覺得人要樂觀,積極面對,人生一定有高高低低,尤其呢個疫情係冇辦法預料,希望大家群策群力,疫情快啲過去,經濟安穩。」

去年情人節,港商男友砌了幾個寫住「Nancy baby」的雪堆,令家燕姐感動不已,今年情人節適逢是大年初三,她與男友又如何慶祝?家燕姐笑笑說:「應該視像,因為最近內地嘅疫情又緊張咗,所以佢嚟香港要隔離,返去又要隔離,希望疫情快啲過去,不過情人節嗰日唔見都OK,年初三赤口嘛,或者我寄盒曲奇畀佢囉,等佢有個驚喜,等佢同屋企人一齊食。」

玄學家李居明指家燕姐今年有機會做嫲嫲,家燕姐說:「當時佢話我屬虎,今年會紅鸞星動,但其實可能係話我屋企人有喜事,我都希望大女珊珊快啲搵個伴,亦希望係個仔同新抱有喜事。」如果真的湊孫,到時會否考慮退休?家燕姐說:「我好鍾意小朋友,我都有諗過,3個仔女都有自己嘅工作,但如果我唔做嘢,我會好唔舒服,因為我鍾意講嘢、唱歌、扮靚,呢啲係我愛好,我呢生人最開心係自己嘅愛好成為我嘅事業,仲可以賺錢,所以我會揀嘢做,唔會退休。」

-----------------------------

《蘋果》英文版免費試睇:了解更多

英文版已登錄《蘋果》App,立即下載/ 更新iOS / Android

-----------------------------

支持蘋果深度報道,深入社區,踢爆權貴,即Like蘋果專題及調查組FB專頁

娛聞樂陪你走遍全球追星,即Like「娛果」FB 專頁!
BannerBanner